ایگزیکٹیو انجینئر ۲۵ہزار روپے رشوت لیتے ہوئے رنگے ہاتھوں گرفتا ر:اے سی بی

سرینگر///
جموںکشمیر اینٹی کرپشن بیورو (اے سی بی) نے راشی ایگزیکٹیو انجینئر کو۲۵ ہزار روپے کی رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
اے سی بی کے ایک ترجمان نے بتایا کہ ایک شخص نے اینٹی کرپشن بیورو میں شکایت درج کی کہ جل شکتی ڈپارٹمنٹ گراؤنڈ واٹر ڈویڑن کشمیر میں تعینات ایگزیکٹیو انجینئر ‘طارق احمد کاچرو الاٹمنٹ کی خاطر ایک لاکھ ۳۶ ہزار روپے کی رشوت کا تقاضہ کر رہا ہے۔
ترجمان نے بتایا کہ شکایت کنندہ نے چند روز قبل مذکورہ آفیسر کو ۳۰ ہزار روپے دئے تھے اور جمعرات کے روز دوسری قسط کے بطور ۲۵ ہزار روپے ایگزیکٹیو انجینئرکو دینے تھے۔
اے سی بی ترجمان نے بتایا کہ شکایت موصول ہوتے ہی اینٹی کرپشن بیورو نے راشی ایگزیکٹیو انجینئر کے خلاف ایف آئی آر زیر نمبر۳۴ کے تحت کیس درج کرکے مزید تحقیقات شروع کی۔انہوں نے کہاکہ اینٹی کرپشن بیورو نے ایک جال بچھایا جس دوران ایگزیکٹیو انجینئر طارق احمد کاچرو ولد نور محمد کاچرو ساکن پانپور لدو پلوامہ کو شکایت کنندہ سے ۲۵ ہزار روپے کی رشوت لیتے ہوئے رنگے ہاتھوں گرفتار کیا۔
بیان کے مطابق آزاد گواہوں کی موجودگی میں ایگزیکٹیو انجینئر سے رشوت کی رقم برآمد کرکے ضبط کی گئی۔
اینٹی کرپشن بیورو نے بتایا کہ ایگزیکٹیو انجینئر کے رہائشی مکان سمیت کئی مقامات پر چھاپہ ماری کی گئی اور اس ضمن میں مزید تحقیقات جاری ہے۔