کولگام؍۲۹؍اکتوبر
کولگام پولیس نے قتل کے ایک ایسے مقدمے میں مفرور ملزم کو گرفتار کرلیا ہے جو سال۲۰۰۶ میں درج کیا گیا تھا۔
ایک بیان میں پولیس نے بتایا کہ ملزم طارق احمد گنائی ولد محمد سبحان گنائی ساکن حسن پورہ باغ، قاضی گنڈ کو قتل کے اس مقدمے کے سلسلے میں گرفتار کیا گیا، جو سال۲۰۰۶ میں پولیس تھانہ کولگام میں درج کیا گیا تھا۔
پولیس کے مطابق۷ستمبر۲۰۰۶ کو پولیس تھانہ کولگام کو محمد مقبول گنائی ولد ثناء اللہ گنائی ساکن حسن پورہ باغ، قاضی گنڈ کی جانب سے ایک تحریری درخواست موصول ہوئی تھی۔ درخواست میں الزام لگایا گیا تھا کہ ایک جھگڑے کے دوران ملزم نے ان کی بیٹی کے سر پر ڈنڈے سے وار کیا، جس کے نتیجے میں اس کی موقع پر ہی موت واقع ہوگئی۔
پولیس نے بتایا کہ اس شکایت کی بنیاد پر پولیس تھانہ کولگام میں ایک ایف آئی آر درج کرکے تعزیراتِ رنبیر قانون کی دفعہ۳۰۲ کے تحت قتل کا مقدمہ قائم کیا گیا اور تحقیقات شروع کی گئی۔
پولیس کے مطابق، عدالتی کارروائی کے دوران ملزم فرار ہوگیا تھا، جس کے بعد عدالتِ سیشن جج کولگام نے اس کی گرفتاری کے وارنٹ جاری کیے۔
پولیس نے مزید بتایا کہ وارنٹ پر کارروائی کرتے ہوئے پولیس تھانہ کولگام کی ایک ٹیم نے ملزم کو گرفتار کیا اور مزید قانونی کارروائی کے لیے عدالت میں پیش کردیا۔
۔۔۔۔۔۔۔۔(ایجنسیاں )
