صاف ستھری اور گرین دہلی کے لیے حکومت پرعزم: سرسا

نئی دہلی، 10 ستمبر (یو این آئی) دہلی کے وزیر ماحولیات منجندر سنگھ سرسا نے بدھ کے روز کہا کہ حکومت دارالحکومت کو صاف ستھرا، سرسبز اور ماحول دوست بنانے کے لیے آلودگی پر قابو پانے، پائیدار ٹرانسپورٹ، سائنسی ویسٹ مینجمنٹ اور قدرتی ماحول کے تحفظ پر بالخصوص زور دے رہی ہے۔
منجندر سنگھ سرسا نے کہا کہ دہلی کے ماحولیاتی چیلنجز پیچیدہ ہیں، لیکن جدت طرازی، ٹیکنالوجی اور اجتماعی کوششوں کے ذریعے ان کا موثر حل تلاش کیا جا سکتا ہے۔ ساؤتھمپٹن یونیورسٹی اور اس کے دہلی سینٹر کے طلباء کے ایک وفد نے بدھ کے روز وزیر ماحولیات سے ملاقات کر کے "دہلی این سی آر میں صاف ہوا کو فروغ دینا” کے موضوع پر مطالعہ پیش کیا۔ اس دوران دہلی کے ماحولیات اور جنگلات کے محکمہ کے سکریٹری وجے کمار بدھوڑی بھی موجود رہے۔ طلباء کے مطالعے میں دہلی-این سی آر میں فضائی آلودگی کو پورے ایئر شیڈ سے جڑا مسئلہ قرار دیتے ہوئے علاقائی سطح پر مربوط کارروائی، بہتر نگرانی، ذریعہ پر مبنی اقدامات اور پیش گوئی پر مبنی ایئر کوالٹی مینجمنٹ کی ضرورت پر زور دیا گیا۔
انہوں نے طلباء کے مطالعے کی ستائش کرتے ہوئے کہا کہ ماحولیاتی چیلنجوں سے نمٹنے اور پائیدار مستقبل کی تعمیر میں نوجوانوں کی شرکت انتہائی اہم ہے۔ انہوں نے کہا کہ نئی نسل کے پاس نئے خیالات اور توانائی ہے نیز وہ روایتی سوچ کو نیا روپ دینے کا حوصلہ رکھتی ہے۔ حکومت نوجوانوں اور تعلیمی اداروں کے ساتھ بات چیت کو بڑھانا چاہتی ہے، تاکہ عملی اور انقلابی حل تیار کیے جا سکیں۔