سرینگر؍۱۰ ستمبر
مرکزی وزیر مملکت برائے اطلاعات و نشریات ایل مروگن نے آج کہا کہ جموں و کشمیر میں ایک بار پھر بھارت اور دنیا بھر کے فلم سازوں کیلئے پسندیدہ فلم سازی کی منزل بننے کی بھرپور صلاحیت موجود ہے۔
جموں و کشمیر کے پہلے بین الاقوامی فلم فیسٹیول کی اختتامی تقریب سے خطاب کرتے ہوئے ایل مروگن نے کہا کہ یہ فیسٹیول وزیر اعظم نریندر مودی کے اس وژن کی عکاسی کرتا ہے جس کے تحت فلم سازوں کو کشمیر میں فلموں کی شوٹنگ اور تخلیق کیلئے حوصلہ افزائی کی جا رہی ہے۔
مروگن نے خطے کے منفرد قدرتی مناظر اور شاندار سنیما ورثے کو اجاگر کرتے ہوئے اعتماد ظاہر کیا کہ جموں و کشمیر میں ایک بار پھر فلم سازی کی اہم منزل بننے کی صلاحیت پیدا ہوئی ہے۔وزیر نے کہا کہ بھارت میڈیا، ڈیجیٹل مواد اور ورچوئل ریئلٹی کے شعبوں میں ایک بڑے عالمی مرکز کے طور پر ابھر رہا ہے۔
مرکزی وزیر مملکت نے تخلیقی معیشت کو مضبوط بنانے کیلئے حکومت کی جانب سے اٹھائے گئے اقدامات پر بھی روشنی ڈالی، جن میں ورلڈ آڈیو ویژول اینڈ انٹرٹینمنٹ سمٹ اور مواد تخلیق کرنے والوں اور فلم سازی کی معاونت کرنے والے مختلف پروگرام شامل ہیں۔ایل مرگن نے نوجوانوں کو صنعت کی ضروریات سے ہم آہنگ ہنر سے آراستہ کرنے کی ضرورت پر زور دیتے ہوئے کہا کہ توجہ باصلاحیت افراد کی پرورش، صنعت سے روابط مضبوط بنانے اور معیاری بنیادی ڈھانچے اور مواقع کی فراہمی پر مرکوز ہے۔
مروگن نے کہا کہ جموں و کشمیر کے نوجوانوں کی فلم سازی، اسکرپٹ رائٹنگ اور ڈیجیٹل کہانی سنانے کے شعبوں میں شرکت بڑھ رہی ہے۔ انہوں نے امید ظاہر کی کہ یہ فیسٹیول مقامی صلاحیتوں کیلئے نئے مواقع پیدا کرنے اور وسیع تر تخلیقی صنعت کے ساتھ تعاون کو فروغ دینے میں معاون ثابت ہوگا۔
۔۔۔۔۔۔۔(دیب ڈیسک)
