اپوزیشن کے 19 ارکان راجیہ سبھا سے معطل

نئی دہلی// راجیہ سبھا میں زبردست شور شرابہ کیا اور کارروائی کے احسن طریقے سے چلانے میں رکاوٹ پیدا کرنے کی وجہ سے آج ترنمول کانگریس کے سات ارکان سمیت تلنگانہ راشٹرا سمیتی، دراوڑ منیترا کزگم (ڈی ایم کے )، کمیونسٹ پارٹی آف انڈیا اور مارکسسی کمیونسٹ پارٹی کے کل ملاکر 19 ارکان کو اس ہفتے کی باقی ماندہ مدت کے لیے ایوان سے معطل کر دیا گیا۔
کھانے کے وقفے کے بعد جب کارروائی شروع ہوئی تو ڈپٹی چیئرمین ہری ونش نے بقیہ اراکین کو بڑے پیمانے پر تباہی پھیلانے والے ہتھیاروں پر پابندی اور ان کی فنڈنگ [؟][؟]سے متعلق ترمیمی بل 2022 پر بولنے کے لیے بلانا شروع کیا، تبھی کچھ اپوزیشن اراکین نے مہنگائی اور جی ایس ٹی پر بحث کرانے کی مانگ کی اس پر مسٹر ہری ونش نے کہا کہ کل اس بل پر بحث مکمل ہو گئی تھی اور آج وزیر کو جواب دینا ہے لیکن کچھ ممبران کل وہاں نہیں تھے ، وہ آج بولنا چاہتے ہیں، اس لیے ان کے نام لیے جا رہے ہیں۔
اس دوران انہوں نے کمیونسٹ پارٹی آف انڈیا مارکسسٹ کے وکاس رنجن بھٹاچاریہ کا نام لیا۔ مسٹر بھٹاچاریہ نے بل سے ہٹ کر مہنگائی پر بولنا شروع کر دیا۔ ڈپٹی چیئرمین نے ان سے کہا کہ وہ صرف اس موضوع پر بات کریں ورنہ کسی اور رکن کی اجازت نہیں دی جائے گی۔ لیکن مسٹر بھٹاچاریہ مہنگائی پر ہی بولتے رہے ۔ اسی دوران مسٹر ہری ونش نے ایک اور رکن کا نام پکارا، جس کی وجہ سے ترنمول کانگریس، ڈی ایم کے ، سی پی آئی (ایم)، سی پی آئی اور ٹی آر ایس کے کچھ ارکان نے ایوان کے بیچ میں نعرے بازی شروع کردی۔
اس پر مسٹر ہری ونش نے ارکان سے اپیل کی کہ وہ ایوان میں پلے کارڈ نہ دکھائیں اور نعرے بازی نہ کریں۔ انہوں نے بعض ارکان کے نام لیتے ہوئے کہا کہ آپ اپنی جگہ پر جائیں ورنہ رول 256 کے تحت ان کے نام لینے پڑیں گے ۔ اس کے بعد انہوں نے ترنمول کانگریس کے کچھ ارکان کا نام بھی لیا اور کہا کہ آپ سبھی اپنی اپنی نشستوں پر واپس آجائیں۔
تاہم اس کے بعد بھی ترنمول کانگریس کے کچھ ارکان کے ساتھ ساتھ سی پی آئی (ایم)، سی پی آئی، ڈی ایم کے اور ٹی آر ایس کے ارکان ایوان کے وسط میں نعرے بازی کرتے رہے ۔
اس پر پارلیمانی امور کے وزیر مملکت وی مرلی دھرن نے ایوان کے 19 ارکان کو اس ہفتے کی بقیہ مدت کے لیے معطل کرنے کی تجویز پیش کی جسے صوتی ووٹ سے منظور کر لیا گیا۔ جن اراکین کو معطل کیا گیا ہے ان میں ترنمول کانگریس کی سشمیتا دیو، مسز موسم نور، مسز شانتا شیتری، مسز ڈولا سین، شانتنو سین، ابیر رنجن بسواس، محمد ندیم الحق، ڈی ایم کے کے ایم ایچ عبداللہ، ایس کلیان سندرم، آر گریرنجن، این آر ایلنگوون، ایم شانموگم، کنی موجھی این وی این شومو، ٹی آر ایس کے بی ایل یادو، رویندرا ودی راجو، دامودر راؤ دیواکونڈا، سی پی آئی (ایم) کے وی شیواداسن، سی پی آئی کے سنتوش کمار پی اور اے اے رحیم شامل ہیں۔