بانڈی پورہ ؍ ۱۴ ؍اگست
ضلع بانڈی پورہ کے داچھی گام علاقے میں ڈی پی ایل کے قریب جمعہ کے روز ایک آٹو کی ٹکر سے ۳۲ سالہ شخص کی موت ہوگئی۔
حکام نے ایک مقامی خبر رساں ایجنسی کو بتایا کہ متوفی کی شناخت داچھی گام کے رہنے والے عرفان احمد بٹ ولد عبدالجبار بٹ کے طور پر ہوئی ہے۔
حکام کے مطابق حادثہ اس وقت پیش آیا جب ایک آٹو نے عرفان احمد بٹ کو ٹکر مار دی۔ حادثے کے فوراً بعد زخمی کو علاج کے لیے ضلع اسپتال بانڈی پورہ منتقل کیا گیا، تاہم وہاں پہنچنے پر ڈاکٹروں نے اسے مردہ قرار دے دیا۔
پولیس نے آٹو ڈرائیور کو گرفتار کرلیا ہے اور واقعے کا نوٹس لیتے ہوئے تحقیقات شروع کردی ہے۔
حکام کے مطابق حادثے کے اصل حالات اور دیگر پہلوؤں کی مزید تفتیش جاری ہے۔
دریں اثنا جنوبی کشمیر کے پلوامہ ضلع کے پانپور علاقے میں وَایاں کھریو کے مقام پر جمعہ کے روز ایک نامعلوم ٹرک کی ٹکر سے ۶۵ سالہ شخص شدید زخمی ہونے کے بعد جاں بحق ہوگیا۔
حکام کے مطابق وَایاں کھریو میں ایک نامعلوم ٹرک نے مذکورہ شخص کو ٹکر ماری، جس کے نتیجے میں وہ شدید زخمی ہوگیا۔ اسے ابتدائی طور پر مقامی اسپتال منتقل کیا گیا، جہاں سے بعد میں بہتر علاج کے لیے سری نگر کے ایس ایم ایچ ایس اسپتال ریفر کیا گیا۔
حکام نے بتایا کہ زخمی شخص نے سری نگر کے اسپتال میں دورانِ علاج زخموں کی تاب نہ لاتے ہوئے دم توڑ دیا۔متوفی کی شناخت وَایاں کھریو کے رہائشی مشتاق احمد بھا ولد ثناء اللہ کے طور پر ہوئی ہے۔پولیس نے واقعے کا نوٹس لیتے ہوئے معاملے کی تحقیقات شروع کردی ہے۔
ایجنسیاں
