جموں؍ ۱۱ ؍اگست
انسدادِ بدعنوانی بیورو (اے سی بی) نے کشتواڑ کے ایک سابق پٹواری کے خلاف مبینہ طور پر ۵ لاکھ روپے رشوت طلب کرنے اور ۳ لاکھ روپے چیک کے ذریعے وصول کرنے کے الزام میں بدعنوانی کا مقدمہ درج کیا ہے۔
اے سی بی کے ایک بیان کے مطابق، پولیس اسٹیشن اے سی بی ڈوڈہ میں ایف آئی آر نمبر ۰۲/۲۰۲۶ انسدادِ بدعنوانی ایکٹ ۱۹۸۸ کی ترمیم شدہ دفعہ ۷ کے تحت محمد عارف میر کے خلاف درج کی گئی ہے، جو کشتواڑ کے پٹوار حلقہ تریگام میں پٹواری کے طور پر تعینات تھے۔
اے سی بی کے مطابق یہ مقدمہ اے سی بی ڈی کے آر جموں کی جانب سے کی گئی تصدیق کے بعد درج کیا گیا۔ شکایت میں الزام لگایا گیا تھا کہ ملزم نے سرکاری ملازم کی حیثیت سے اپنے عہدے کا مبینہ غلط استعمال کرتے ہوئے شکایت کنندہ سے فرد جاری کرنے کے عوض ۵ لاکھ روپے کی رشوت طلب کی۔
اے سی بی نے الزام عائد کیا ہے کہ بعد ازاں ملزم نے مبینہ طور پر ۳ لاکھ روپے بطور غیر قانونی رشوت چیک کے ذریعے وصول کیے، جس کے بعد متعلقہ فرد جاری کی گئی۔
تحقیقات کے سلسلے میں اے سی بی نے مجاز عدالت سے تلاشی کا وارنٹ حاصل کیا اور کشتواڑ میں گرڈ اسٹیشن کے قریب مالی پیٹھ میں واقع ملزم پٹواری کی رہائش گاہ پر تلاشی لی۔
انسدادِ بدعنوانی بیورو کے مطابق تلاشی مجسٹریٹ اور آزاد گواہوں کی موجودگی میں انجام دی گئی۔اے سی بی نے کہا ہے کہ مبینہ بدعنوانی کے معاملے سے متعلق تمام حقائق اور حالات کا پتہ لگانے کے لیے مزید تحقیقات جاری ہے۔
ایجنسیاں
۔۔۔۔۔۔۔۔۔۔۔۔۔
