سرینگر؍ ۶ ؍اگست
لیفٹیننٹ گورنر منوج سنہا سے جمعرات کو لوک بھون میں مختلف وفود اور ممتاز شخصیات نے علیحدہ علیحدہ ملاقاتیں کیں اور عوامی فلاح، معذور افراد کی بحالی، سیلاب متاثرین کی امداد، سیاحت، دستکاری اور دیگر اہم امور پر تبادلۂ خیال کیا۔
آرٹیفیشل لمبس مینوفیکچرنگ کارپوریشن آف انڈیا (اے ایل آئی ایم سی او) کے چیئرمین و منیجنگ ڈائریکر پروین کمار نے لیفٹیننٹ گورنر سے ملاقات کے دوران معذور افراد اور بزرگ شہریوں کو معاون آلات، امدادی سہولیات اور بحالی خدمات کی فراہمی سے متعلق کارپوریشن کے اقدامات سے آگاہ کیا۔ ان کے ہمراہ اے ایل آئی ایم سی او کے ڈپٹی جنرل منیجر ایس کے ترپاٹھی اور دیگر عہدیدار بھی موجود تھے۔
اسی دوران سنت شری بالک یوگیشور داس جی مہاراج نے بھی لیفٹیننٹ گورنر سے ملاقات کی۔
دریں اثنا، راجہ وقار کی قیادت میں اُوڑی سے تعلق رکھنے والے بھارتیہ جنتا پارٹی (بی جے پی) کے ایک وفد نے لیفٹیننٹ گورنر سے ملاقات کرکے بونیار کے سیلاب متاثرہ خاندانوں کی فلاح و بہبود سے متعلق مختلف مسائل اُن کے سامنے رکھے۔
اس کے علاوہ ٹورسٹ ٹریڈ انٹرسٹ گلڈ کے چیئرمین ظہور احمد کرناہی نے اپنے رفیق اور گلڈ کے بانی رکن محمد اکرم سیاح کے ہمراہ لیفٹیننٹ گورنر سے ملاقات کی اور سیاحتی شعبے سے متعلق مختلف امور پر تبادلۂ خیال کیا۔
دوسری جانب معروف دستکار عبدالقیوم وانی نے لیفٹیننٹ گورنر سے ملاقات کے دوران چین اسٹچ دستکاری کے فروغ اور اس سے وابستہ کاریگروں کو درپیش مسائل سے آگاہ کیا۔
اسی روز مسودہ فاؤنڈیشن کے چیئرمین عمر بھٹ نے بھی لیفٹیننٹ گورنر منوج سنہا سے ملاقات کی اور مختلف عوامی و سماجی امور پر تبادلۂ خیال کیا۔
۔۔۔۔۔۔
(ڈی آئی پی آر )
