جموں؍ ۶ ؍اگست
جموں کشمیر میں دفعہ ۳۷۰ کی منسوخی کی ساتویں برسی کے موقع پر سخت حفاظتی انتظامات کے باعث ایک روزہ معطلی کے بعد جمعرات کو سالانہ شری امرناتھ یاترا دوبارہ شروع ہو گئی۔
اس سلسلے میں ۱۸۰۱ یاتریوں کا ایک قافلہ جموں کے بھگوتی نگر بیس کیمپ سے جنوبی کشمیر میں واقع امرناتھ گپھا کی جانب روانہ ہوا۔
حکام کے مطابق اب تک ۳۸۸۰ میٹر کی بلندی پر واقع مقدس گپھا میں برفانی شیو لنگم کے ۴ لاکھ ۷۱ ہزار سے زائد یاتری درشن کر چکے ہیں۔
انہوں نے بتایا کہ یاتریوں کا ۲۸واں قافلہ جمعرات کی صبح ۲ بج کر ۴۵ منٹ پر سخت حفاظتی حصار میں بھگوتی نگر یاتری نواس سے بالتل بیس کیمپ کے لیے روانہ ہوا۔
حکام نے کہا کہ اس روز پہلگام راستے سے کوئی قافلہ روانہ نہیں کیا گیا۔انہوں نے بتایا کہ اس قافلے میں ۱۳۴۷ مرد، ۳۵۱ خواتین، ۸۹ سادھو اور ۱۴ سادھویاں شامل تھیں، جو ۷۴ گاڑیوں میں سفر کر رہے تھے۔
حکام کے مطابق تازہ قافلے کی روانگی کے ساتھ ہی رواں برس جموں سے امرناتھ یاترا کے لیے روانہ ہونے والے یاتریوں کی مجموعی تعداد ایک لاکھ ۴۳ ہزار ۵۱۳ تک پہنچ گئی ہے۔۵۷ روزہ سالانہ امرناتھ یاترا ۲۸ ؍اگست کو اختتام پذیر ہوگی۔
۔۔۔۔۔۔۔
(ایجنسیاں)
