سرینگر؍۳۱ جولائی
جنوبی کشمیر کے ضلع کولگام کے کِلام علاقے میں جمعہ کی شام دہشت گردوں کی فائرنگ میں ایک غیر مقامی مزدور ہلاک جبکہ دوسرا شدید زخمی ہو گیا۔
انسپکٹر جنرل آف پولیس (آئی جی پی) کشمیر وی کے بردی نے بتایا کہ دہشت گردوں نے کِلام میں دو غیر مقامی مزدوروں کو نشانہ بنایا، جس کے نتیجے میں دونوں شدید زخمی ہو گئے۔
دونوں زخمیوں کو فوری طور پر قریبی اسپتال منتقل کیا گیا، جہاں ایک مزدور زخموں کی تاب نہ لاتے ہوئے دم توڑ گیا، جبکہ دوسرے زخمی مزدور کی سرجری جاری ہے۔
واقعے کے فوراً بعد سکیورٹی فورسز نے علاقے کو محاصرے میں لے کر حملہ آوروں کی تلاش کے لیے بڑے پیمانے پر تلاشی آپریشن شروع کر دیا۔
یہ حملہ اس واقعے کے چند روز بعد پیش آیا ہے جس میں دہشت گردوں نے اننت ناگ شہر میں ایک پولیس افسر کو گولی مار کر ہلاک کر دیا تھا۔
