ایجنسیاں
سرینگر؍۲۹ جون
چیف الیکشن کمشنر گیانیش کمار نے پیر کے روز کہا کہ ہندوستان شفاف انتخابی عمل کے معاملے میں دنیا کی بڑی جمہوریتوں کی قیادت کر رہا ہے، جہاں انتخابی عمل کے ہر مرحلے کا سیاسی جماعتیں اور امیدوار خود آڈٹ کرتے ہیں۔
کشمیر کے تین روزہ دورے پر آئے چیف الیکشن کمشنر نے یہاں نامہ نگاروں سے گفتگو کرتے ہوئے کہا، ’’ہم نے دنیا کے سب سے شفاف انتخابی عمل کے مختلف مراحل پر تبادلہ خیال کیا، جن میں ووٹر فہرست کی تیاری، پولنگ اور ووٹوں کی گنتی شامل ہیں۔ ان تمام مراحل کا سیاسی جماعتیں اور امیدوار بیک وقت جائزہ لیتے اور ان کی نگرانی کرتے ہیں۔‘‘
اس سے قبل چیف الیکشن کمشنر نے ضلع بڈگام میں، جو سری نگر سے تقریباً۱۲ کلومیٹر دور واقع ہے، بوتھ سطحی افسران (بی ایل اوز) کے ایک اجتماع سے خطاب کیا۔
کمار نے کہا کہ اس وقت ہندوستان انٹرنیشنل انسٹی ٹیوٹ فار ڈیموکریسی اینڈ الیکٹورل اسسٹنس (انٹرنیشنل آئیڈیا) کی صدارت کر رہا ہے، جو ایک بین الحکومتی تنظیم ہے اور دنیا بھر میں پائیدار جمہوریت کے فروغ کے لیے کام کرتی ہے۔
چیف الیکشن کمشنر نے کہا، ’’ہندوستان کے انتخابی عمل کو دیکھتے ہوئے۲۰۲۶ میں بھارت نہ صرف دنیا کی بڑی جمہوری ریاستوں کی قیادت کر رہا ہے بلکہ انٹرنیشنل آئیڈیا کا چیئرمین بھی ہے۔‘‘
کمار نے بوتھ سطحی افسران کو جمہوریت کا ستون قرار دیتے ہوئے کہا، ’’میں ایک مرتبہ پھر آپ سب کے ذریعے جموں و کشمیر کے تمام ووٹروں کو مبارک باد اور نیک خواہشات پیش کرتا ہوں، اسی طرح تمام بی ایل اوز، بی ایل او سپروائزرز، اسسٹنٹ الیکٹورل رجسٹریشن افسران (اے ای آر اوز)، الیکٹورل رجسٹریشن افسران (ای آر اوز) اور ڈسٹرکٹ الیکشن افسران (ڈی ای اوز) کو بھی مبارک باد پیش کرتا ہوں۔‘‘
