ایجنسیز
اننت ناگ؍۲۰مئی
جموں کشمیر حکومت نے بدھ کے روز یہاں ایک ہائی اسکول کا نام پونی رائیڈ آپریٹر عادل حسین شاہ کی یاد میں منسوب کر دیا، جنہوں نے گزشتہ سال پہلگام دہشت گردانہ حملے کے دوران سیاحوں کی حفاظت کرتے ہوئے اپنی جان قربان کر دی تھی۔
عادل حسین شاہ ایک پونی والا تھے جو۲۲ اپریل۲۰۲۵کو جنوبی کشمیر کے سیاحتی مقام پہلگام کے بیسرن میدانوں میں دہشت گردوں کے ایک گروپ کے حملے میں۲۵سیاحوں کے ساتھ جاں بحق ہوئے تھے۔
گورنمنٹ ہائی اسکول ہاپتنار کا نام تبدیل کرکے ’’شہید عادل میموریل ہائی اسکول ہاپتنار‘‘ رکھنے کی تقریب کی صدارت وزیر تعلیم سکینہ ایتو نے کی۔ اس موقع پر عادل شاہ کے اہل خانہ بھی موجود تھے۔
سکینہ ایتو نے کہا کہ تعلیمی ادارے کا نام تبدیل کرنا عادل شاہ کی بہادری اور قربانی کو خراجِ عقیدت پیش کرنے کے مترادف ہے، جنہوں نے کئی سیاحوں کو بچاتے ہوئے اپنی جان نچھاور کر دی۔
وزیر صحت نے صحافیوں سے بات کرتے ہوئے کہا، ’’جب وزیر اعلیٰ عمر عبداللہ نے تعزیت کیلئے اہل خانہ سے ملاقات کی تھی تو انہوں نے اعلان کیا تھا کہ عادل (شاہ) کی قربانی کے اعتراف میں اس ہائی اسکول کو ان کے نام سے منسوب کیا جائے گا۔‘‘
وزیر تعلیم نے کہا کہ عادل شاہ کی قربانی نے یہ ثابت کر دیا کہ کشمیر کے لوگ کتنے مہمان نواز ہیں۔
ایتو نے کہا، ’’جموں و کشمیر، خصوصاً وادی کشمیر کے لوگوں کو شک کی نگاہ سے دیکھا جاتا ہے، لیکن ان کی قربانی نے ثابت کیا کہ کشمیر کے لوگ اپنی مہمان نوازی کے معاملے میں کتنے حساس ہیں۔ سیاحوں کو بچانے میں ان کے کردار کو کوئی فراموش نہیں کر سکتا اور یہ ان کے نام کو زندہ رکھنے کی ایک چھوٹی سی کوشش ہے۔‘‘
