ایجنسیز
سرینگر؍۵مئی
اپنی پارٹی کے صدر‘ سید محمد الطاف بخاری نے منگل کے روز وزیر اعلیٰ عمر عبداللہ کی قیادت والی نیشنل کانفرنس پر الزام عائد کیا کہ اس نے حالیہ انتخابات میں عوام کو دھوکہ دینے کے لیے آرٹیکل۳۷۰؍اور ۳۵اے کے معاملے پر ’جذباتی بلیک میل‘ کا سہارا لیا۔
اپنی پارٹی کے سربراہ نے کہا’’کیا آپ نے حالیہ انتخابات دیکھے؟ لوگوں نے۳۷۰؍اور۳۵اے کے جذباتی بلیک میل پر ووٹ دیا۔ انہوں نے ایک لاکھ نوکریاں دینے،۲۰۰ یونٹ مفت بجلی فراہم کرنے اور فی فرد۱۰کلو راشن بڑھانے کے وعدے کیے، لیکن یہ سب جھوٹ تھا۔ عوام سے جو کچھ بھی کہا گیا وہ غلط ثابت ہوا‘‘۔
بخاری نے مزید الزام لگایا کہ علاقائی جماعتیں ووٹ حاصل کرنے کے لیے مسلسل ’دہلی کو برا بھلا‘ کہتی رہی ہیں۔ انہوں نے کہا’’دہلی کو جموں و کشمیر کی ضرورت ہے، لیکن اگر دہلی ہمارے نوجوانوں کا احترام نہیں کرتی تو ہمیں ایسی دہلی کی ضرورت نہیں۔ ہمیں ایسی دہلی چاہیے جہاں ہمارے بزرگوں کا احترام ہو‘‘۔
اپنی پارٹی کے صدر نے کہا’’ہماری جماعت اور الطاف بخاری کی سیاست سچائی پر مبنی ہے۔ ہم عوام کو دھوکہ نہیں دیتے۔‘‘
