لندن، 4 اپریل (یو این آئی) کیرن ٹریپیئر اس موسمِ گرما میں معاہدہ ختم ہونے کے بعد نیو کیسل یونائیٹڈ کو خیرباد کہہ دیں گے۔
رائٹ بیک پوزیشن پر کھیلنے والے ٹریپیئر جنوری 2022 میں ایٹلیٹیکو میڈرڈ سے نیو کیسل میں شامل ہوئے تھے، اور وہ سعودی قیادت والے کنسورشیم کے کلب کا کنٹرول سنبھالنے کے بعد پہلا باضابطہ معاہدہ تھا۔ انہوں نے نیو کیسل کی حالیہ ترقی میں کلیدی کردار ادا کیا اور ایڈی ہاؤ کی ٹیم کو گزشتہ سیزن میں ای ایف ایل کپ جتوا کر سات دہائیوں سے جاری ٹرافی کا انتظار ختم کرنے میں مدد دی۔ اس کے علاوہ وہ 2023 اور 2025 میں کلب کو چیمپئنز لیگ کے لیے کوالیفائی کروانے میں بھی پیش پیش رہے۔
بی بی سی اسپورٹس کے مطابق، 35 سالہ کھلاڑی نے ایک مشترکہ بیان میں اعلان کیا کہ وہ سیزن کے اختتام پر اس کلب سے رخصت ہو جائیں گے جہاں انہوں نے "سب سے زیادہ اپنائیت” محسوس کی۔ انہوں نے جذباتی انداز میں کہا:”یہ ایک جذباتی لمحہ ہے اور میں اسے بہت یاد کروں گا۔ میں اپنے حامیوں کا تہہ دل سے شکریہ ادا کرنا چاہتا ہوں جنہوں نے میرے اچھے اور برے وقت میں ہمیشہ میرا ساتھ دیا۔ اپنے ساتھی کھلاڑیوں سے بھی کہوں گا کہ آپ لوگوں کے ساتھ ٹرافی جیتنا میرے کیریئر کا سب سے یادگار لمحہ تھا۔”
ٹریپیئر نے ہیڈ کوچ ایڈی ہاؤ کا بھی شکریہ ادا کیا جنہوں نے ان پر "اعتماد” کیا اور انہیں نیو کیسل کا حصہ بنایا۔ یاد رہے کہ اس سے قبل دونوں برنلے میں بھی ایک ساتھ کام کر چکے تھے۔
ایڈی ہاؤ کو یقین ہے کہ ٹریپیئر اپنے قیام کے آخری ایام میں ٹیم کو بلندیوں پر چھوڑنے کے لیے اپنی پوری توانائی صرف کر دیں گے۔ ان کی یہ خدمات کلب کی تاریخ میں ان کی ایک منفرد پہچان بن کر یاد رکھی جائیں گی۔
