ایجنسیز
سرینگر؍۲۸مارچ
کشمیر میں حکام نے ہفتہ کے روز وادی کے دو اضلاع بانڈی پورہ اور گاندربل کیلئے برفانی تودے (ایولانچ) کا انتباہ جاری کرتے ہوئے لوگوں کو انتہائی محتاط رہنے کی ہدایت دی ہے۔
حکام کے مطابق آئندہ۲۴ گھنٹوں کے دوران بانڈی پورہ اور گاندربل میں۲۴۰۰میٹر سے زائد بلندی والے علاقوں میں درمیانے درجے کے خطرے کا برفانی تودہ گرنے کا امکان ہے۔
ایڈوائزری میں کہا گیا ہے’’لوگوں کو سختی سے مشورہ دیا جاتا ہے کہ وہ برفانی تودوں کے خطرے والے علاقوں، بشمول ڈھلوانوں، پہاڑی خطوں اور اونچائی والے مقامات کا رخ کرنے سے گریز کریں جب تک حکام کی جانب سے مزید ہدایات جاری نہ ہوں‘‘۔
مقامی باشندوں، سیاحوں اور خانہ بدوش برادریوں سے کہا گیا ہے کہ وہ سرکاری ہدایات پر عمل کریں اور اپنی سلامتی کیلئے انتظامیہ کے ساتھ تعاون کریں۔
واضح رہے کہ جمعہ کے روز ضلع گاندربل میں زوجیلا پاس کے مقام پر متعدد برفانی تودے گرنے کے واقعات پیش آئے تھے، جن کے نتیجے میں کئی گاڑیاں پھنس گئیں اور سات افراد کی موت واقع ہوئی۔ سرینگر-لیہہ قومی شاہراہ پر واقع زوجیلا پاس وادی کشمیر کو لداخ سے جوڑتا ہے۔
