سرینگر؍۲۷مارچ
ایئرپورٹس اتھارٹی آف انڈیا(اے اے آئی) نے جمعہ کے روز اعلان کیا ہے کہ سرینگر انٹرنیشنل ایئرپورٹ پر رن وے کے کام کے باعث اپریل سے جولائی کے درمیان پروازوں کی سرگرمیاں محدود رہیں گی۔
بھارتی فضائیہ کی جانب سے جاری کردہ ایک بیان کے مطابق، اپریل کے پہلے ہفتے سے شروع ہونے والے رن وے کے کام کی وجہ سے۶؍اپریل سے۳۱ جولائی تک شیڈول پروازوں کے آپریشنل اوقات عارضی طور پر شام۵بجے تک محدود رہیں گے۔ اس بات کی اطلاع اے اے آئی سرینگر نے اپنے سرکاری ایکس ہینڈل پر دی۔
بیان میں کہا گیا ہے کہ اس وقت سرینگر ہوائی اڈے پر روزانہ صبح۸بجے سے رات۱۰ بجے تک تقریباً۶۰پروازوں (آمد و رفت) کی نقل و حرکت ہوتی ہے۔
اے اے آئی کے مطابق، اگرچہ آپریشن کے اوقات کم کیے جا رہے ہیں، تاہم ڈی جی سی اے کی منظور شدہ سمر شیڈول کے مطابق پروازوں کی تعداد میں اضافہ متوقع ہے۔ ایئر لائنز نئی ٹائمنگ کے مطابق اپنی پروازوں کی منصوبہ بندی اور آپریشن کریں گی۔
اتھارٹی نے کہا کہ وہ محفوظ، مؤثر اور بغیر رکاوٹ سفر کو یقینی بنانے کے لیے پُرعزم ہے۔
مسافروں کو ہدایت دی گئی ہے کہ وہ تازہ ترین معلومات کے لیے صرف سرکاری ذرائع پر انحصار کریں اور غیر مصدقہ اطلاعات سے گریز کریں۔(ایجنسیاں)
