ایجنسیز
سرینگر؍۲۷مارچ
جموں و کشمیر پولیس نے جمعہ کے روز سوپور سب ڈویژن میں تین اشتہاری ملزمان کی غیر منقولہ جائیدادیں ضبط کر لیں، جو دہشت گردی کے نیٹ ورک کے خلاف جاری کارروائیوں کا حصہ ہے۔
پولیس بیان کے مطابق یہ کارروائی سوپور پولیس نے ایف آئی آر نمبر۰۲/۲۰۰۸کے سلسلے میں انجام دی، جو پولیس اسٹیشن پنزلہ میں ای اینڈ آئی ایم سی او ایکٹ کی دفعات۲/۳کے تحت درج ہے۔
پولیس نے بتایا کہ ضبطی کی یہ کارروائی نادیہال میں محکمہ مال کے اشتراک سے کی گئی، جہاں تین ملزمان کئی برسوں سے گرفتاری سے بچتے آ رہے تھے اور عدالت نے انہیں دفعہ۸۷ضابطہ فوجداری کے تحت اشتہاری قرار دیا تھا۔
ضبط کی گئی جائیدادوں میں ریاض احمد لون کی۲ کنال۱۶مرلہ اراضی، اعجاز احمد لون کی۱۰مرلہ زمین اور مشتاق احمد شاہ کی۲کنال زمین شامل ہے۔
پولیس کے مطابق عدالت کے احکامات پر دفعہ۸۸ضابطہ فوجداری کے تحت ضبطی کی کارروائی مکمل کی گئی، جو ریونیو ریکارڈ کی تصدیق اور مقامی تحقیقات کے بعد عمل میں لائی گئی۔ یہ کارروائی ریونیو حکام اور آزاد گواہوں کی موجودگی میں انجام دی گئی اور تمام قانونی تقاضے پورے کیے گئے۔
پولیس نے کہا کہ یہ اقدام ملک کی سلامتی اور سالمیت کے خلاف سرگرمیوں میں ملوث مفرور ملزمان کے خلاف قانون کی عملداری کو یقینی بنانے کی مسلسل کوششوں کا حصہ ہے۔
