ایجنسیز
راجوری؍۲۶مارچ
ایک اسسٹنٹ پروفیسر جمعرات کو اس وقت جاں بحق ہوگئیں جب ان کی کار سڑک کنارے دیوار سے ٹکرا گئی، جبکہ ان کے شوہر زخمی ہوگئے۔ یہ حادثہ راجوری ضلع کے کلر علاقے میں پیش آیا۔
جاں بحق خاتون کی شناخت ڈاکٹر تبسم ناز کے نام سے ہوئی ہے، جو پونچھ ڈگری کالج میں اسسٹنٹ پروفیسر کے عہدے پر تعینات تھیں۔ ان کے زخمی شوہر محمد حمید کو جی ایم سی راجوری منتقل کر دیا گیا ہے، جہاں ان کا علاج جاری ہے۔
حکام کے مطابق، یہ حادثہ اس وقت پیش آیا جب کار کلر میں سڑک کنارے دیوار سے ٹکرا گئی، جس کے نتیجے میں ایک شخص جاں بحق اور ایک زخمی ہوگیا۔
پولیس نے واقعہ کا نوٹس لے کر ضروری کارروائی شروع کر دی ہے۔
دریں اثنا، جمعرات کو وسطی کشمیر کے ضلع گاندربل کے کنگن علاقے میں ریل گنڈ کے مقام پر دو کاروں کے درمیان تصادم میں پانچ افراد زخمی ہوگئے، جن میں مہاراشٹر سے آنے والے دو سیاح بھی شامل ہیں۔ زخمیوں میں سے ایک ڈرائیور کی حالت تشویشناک بتائی جاتی ہے۔
ریل گنڈ کنگن میں یہ حادثہ پیش آیا، جس کے بعد پولیس اور مقامی لوگوں نے فوری طور پر امدادی کارروائی شروع کی۔
اطلاعات کے مطابق، معلومات ملتے ہی ایس ایچ او پولیس ریاض احمد اپنی ٹیم کے ہمراہ موقع پر پہنچے اور ریسکیو آپریشن شروع کیا۔
مقامی لوگوں نے بتایا کہ تمام زخمیوں کو فوری طور پر پرائمری ہیلتھ سینٹر گنڈ میں علاج کے لیے منتقل کر دیا گیا۔ بعد میں دو زخمیوں کو سب ڈسٹرکٹ ہسپتال کنگن منتقل کیا گیا۔
ہسپتال ذرائع کے مطابق، ایک ڈرائیور کی حالت تشویشناک ہے اور اس کا علاج جاری ہے۔
پولیس نے واقعہ کا نوٹس لے کر حادثے کی وجوہات جاننے کے لیے کارروائی شروع کر دی ہے۔ ابتدائی اطلاعات میں تیز رفتاری کے باعث آمنے سامنے ٹکراؤ بتایا گیا ہے، تاہم حکام کا کہنا ہے کہ صحیح حالات کی تحقیقات کی جا رہی ہیں۔
پانچ زخمیوں میں سے تین کا تعلق لداخ سے ہے جبکہ دو مہاراشٹر سے ہیں۔
