بارہمولہ میں الیکٹرانکس دکان  میں چوری کا ملزم دہلی سے گرفتار

ایجنسیز

سرینگر؍۲۰مارچ

جموں و کشمیر پولیس نے ضلع بارہمولہ میں درج ایک چوری کے معاملے میں ملوث ملزم کو دہلی سے گرفتار کر لیا ہے، حکام نے جمعہ کو بتایا۔

پولیس ترجمان کے مطابق راحیل احمد ریشی کو بارہمولہ کے کنزر پولیس اسٹیشن کی ایک ٹیم نے ایک الیکٹرانک اشیاء کی دکان میں چوری کے الزام میں گرفتار کیا۔

ترجمان نے بتایا کہ بلال احمد بٹ نے۹مارچ کو کنزر پولیس اسٹیشن میں شکایت درج کرائی تھی کہ نامعلوم افراد نے اس کی دکان سے۲۰موبائل فون، ایک لیپ ٹاپ اور۵ہزار روپے نقد چرا لیے ہیں۔

اس کے بعد متعلقہ دفعات کے تحت مقدمہ درج کرکے تحقیقات شروع کی گئیں۔

ترجمان نے کہا’’تحقیقات کے دوران پولیس ٹیموں نے سی سی ٹی وی فوٹیج اور دیگر تکنیکی شواہد کا جائزہ لیا، جس کے نتیجے میں ملزم کی شناخت راحیل احمد ریشی ساکن گونی پورہ، کنزر کے طور پر ہوئی‘‘۔

انہوں نے مزید بتایا کہ ملزم کا سراغ دہلی میں لگا جس کے بعد ایک پولیس ٹیم وہاں روانہ کی گئی اور قومی دارالحکومت سے اسے گرفتار کر لیا گیا۔

ملزم کے قبضے سے چوری شدہ ایک لیپ ٹاپ اور۱۳موبائل فون بھی برآمد کیے گئے ہیں