واقعے کی مکمل اور مقررہ مدت میں تحقیقات انجام دےنے کی ہدایت
جموں؍۱۴مارچ
پولیس نے سابق وزیر اعلیٰ جموں و کشمیر اور نیشنل کانفرنس کے صدر فاروق عبداللہ پر جموں میں حال ہی میں پیش آئے فائرنگ کی ناکام کوشش کے واقعے کی تحقیقات کے لیے ایک خصوصی تحقیقاتی ٹیم (ایس آئی ٹی) تشکیل دے دی ہے۔
زونل پولیس ہیڈکوارٹر جموں کی جانب سے جاری حکم نامے کے مطابق انسپکٹر جنرل آف پولیس جموں زون بھیم سین توتی نے بتایا کہ یہ واقعہ۱۱مارچ کو اس وقت پیش آیا جب فاروق عبداللہ شہر کے گریٹر کیلاش علاقے میں واقع ایک بینکوئٹ ہال میں شادی کی تقریب میں شریک تھے۔
اطلاعات کے مطابق رات تقریباً۱۰بج کر۱۰ منٹ پر جب وہ تقریب سے روانہ ہو رہے تھے تو ایک شخص نے مبینہ طور پر قریب سے ریوالور نکال کر فائرنگ کرنے کی کوشش کی۔
تاہم ان کی حفاظت پر مامور پولیس اہلکاروں کی بروقت کارروائی کے باعث یہ کوشش ناکام بنا دی گئی۔
واقعے کے بعد گنگیال پولیس اسٹیشن جموں میں ایف آئی آر نمبر۲۹/۲۰۲۶ کے تحت بھارتیہ نیایا سنہتا (بی این ایس) اور آرمز ایکٹ کی متعلقہ دفعات کے تحت مقدمہ درج کیا گیا ہے۔
معاملے کی سنگینی اور حساسیت کو مدنظر رکھتے ہوئے پولیس نے ڈی آئی جی جے ایس کے رینج کی نگرانی میں ایک ایس آئی ٹی تشکیل دی ہے جو اس واقعے کی تفصیلی تحقیقات کرے گی۔
اس ٹیم میں ایس ایس پی سنجے شرما، ایس پی ہیڈکوارٹر جموں ارشاد حسین راتھر، ڈی ایس پی اروند کمار سمبیال اور جموں پولیس کے دیگر افسران شامل ہیں۔
انسپکٹر جنرل آف پولیس جموں زون بھیم سین توتی کی جانب سے جاری حکم نامے میں ایس آئی ٹی کو ہدایت دی گئی ہے کہ وہ اس واقعے کی مکمل اور مقررہ مدت کے اندر تحقیقات انجام دے
