تعلیم ادارے آج بھی بند رہیں گی‘موبائل انٹرنیٹ کی رفتار محدود
سرینگر؍۲مارچ
ایران کے سپریم لیڈر آیت اللہ علی خامنہ ای کی امریکہ اور اسرائیل کے مشترکہ حملے میں ہلاکت کے بعد وادی میں احتیاطی اقدامات کے طور پر پیر کو بندشیں نافذ رہیں ۔
حکام کے مطابق لال چوک کے تاریخی گھنٹہ گھر کو مکمل طور پر سیل کر دیا گیا ہے اور اس کے اطراف بیریکیڈز نصب کر دیے گئے ہیں۔شہر بھر میں پولیس اور نیم فوجی دستے سی آر پی ایف کی بڑی تعداد تعینات کی گئی ہے۔
آیت اللہ علی خامنہ ای ہفتے کے روز تہران میں ایران پر امریکہ اور اسرائیل کے مشترکہ فضائی حملے کے دوران مارے گئے تھے۔ ایرانی سرکاری میڈیا نے اتوار کو ان کی ہلاکت کی تصدیق کی، جس کے بعد دنیا بھر میں احتجاج اور سوگ کی لہر دوڑ گئی۔
حکام کا کہنا ہے کہ امن و قانون کی صورتحال برقرار رکھنے کے لیے احتیاطی طور پر یہ پابندیاں عائد کی گئی ہیں۔ شہر میں داخل ہونے والے اہم چوراہوں اور راستوں پر خار دار تاریں اور بیریکیڈز نصب کیے گئے ہیں۔
وادی کے دیگر اضلاع میں شیعہ اکثریتی علاقوں میں بھی اسی نوعیت کی پابندیاں نافذ کی گئی ہیں۔
پیر کے روز کشمیر بھر میں موبائل انٹرنیٹ کی رفتار کم کر دی گئی، حکام نے بتایا۔
حکام کے مطابق یہ اقدام علاقے میں امن و قانون کی صورتحال برقرار رکھنے کے لیے احتیاطی تدبیر کے طور پر اٹھایا گیا۔
حکام نے بتایا کہ وادی کشمیر میں تمام موبائل نیٹ ورکس پر تیز رفتار انٹرنیٹ کو محدود کر دیا گیا ہے اور مجموعی طور پر نیٹ ورک اسپیڈ کم کر دی گئی ہے۔
ادھر پولیس نے تمام میڈیا اداروں اور نیوز پلیٹ فارمز کو ایک ایڈوائزری جاری کرتے ہوئے رپورٹنگ میں اعلیٰ ترین ذمہ داری اور پیشہ ورانہ معیار اختیار کرنے کی اپیل کی ہے۔
ایڈوائزری میں کہا گیا ہے’’غیر مصدقہ معلومات، قیاس آرائیوں یا افواہوں کی اشاعت سے گریز کریں؛ تمام خبروں کو معتبر اور مستند ذرائع سے تصدیق کے بعد ہی نشر کریں؛ اور ایسی سنسنی خیز سرخیوں سے بچیں جو غیر ضروری خوف و ہراس پیدا کر سکتی ہوں۔‘‘
پولیس کا کہنا ہے کہ عوامی اعتماد کو برقرار رکھنے اور غلط معلومات کے پھیلاؤ کو روکنے کے لیے ذمہ دارانہ اور درست رپورٹنگ نہایت ضروری ہے۔
ادھر انتظامیہ نے طلبہ کی سلامتی اور امن و قانون برقرار رکھنے کے پیش نظر سرکاری و نجی اسکولوں سمیت تمام تعلیمی اداروں کو دو روز کے لیے بند رکھنے کا بھی فیصلہ کیا ہے۔ کشمیر یونیورسٹی نے منگل کو بھی ہونے والے تمام امتحانات کو ملتوی کردیا ہے ۔
