’دہشت گردوں کے ہاتھوں کشمیری پنڈتوں کے قتل عام کا درد اتنا گہرا ہے کہ وقت بھی اسے کم نہیں کر سکا‘
جموں: جموں کشمیر کے لیفٹیننٹ گورنر منوج سنہا نے جمعرات کو کہا کہ کشمیری پنڈت برادری کی وادی میں مکمل وقار اور سلامتی کے ساتھ واپسی وزیر اعظم نریندر مودی کا عہد ہے۔
ایل جی نے زور دیا کہ جموں و کشمیر میں دہشت گردی کے ماحولیاتی نظام نے سچ کو دفنانے کی کوشش کی، مگر دہشت گرد اور ان کے حمایتی نیٹ ورک جنہوں نے دہشت پھیلائی اور نسلوں کی روحوں کو زخمی کیا، انہیں کبھی معاف نہیں کیا جائے گا اور نہ ہی فراموش کیا جائے گا۔
سنہا نے پروفیسر اشوک کول کی تصنیف کردہ کتاب ’Kashmir-Nativity Regained‘کی تقریبِ اجرا سے خطاب کرتے ہوئے کہا’’کشمیری پنڈتوں کی مکمل وقار اور سلامتی کے ساتھ واپسی وزیر اعظم نریندر مودی کا عزم ہے‘‘۔
سنہا نے کہا کہ۲۰۱۹کے بعد جموں و کشمیر میں نمایاں تبدیلی آئی ہے۔ان کاکہنا تھا’’یونین ٹیریٹری کے عوام کے خواب اور مستقبل تباہ کرنے کے مخالفین کے مذموم منصوبے فیصلہ کن طور پر ناکام بنا دیے گئے ہیں۔انتھک کوششوں کے ذریعے اس سرزمین کی قدیم عظمت بحال کی گئی ہے اور ترقی کو رفتار ملی ہے۔ بہت جلد یہ سرزمین دہشت گردی کی لعنت سے مکمل طور پر آزاد ہو جائے گی‘‘۔
اجرا شدہ کتاب کشمیری پنڈتوں کے انخلا کا جائزہ لیتی ہے اور تاریک دنوں کی دہشت اور آبائی جڑوں سے اکھاڑے جانے کی دیرپا تباہی کو بیان کرتی ہے۔
لیفٹیننٹ گورنر نے کہا’’میں کشمیری پنڈت برادری کے ناقابل تسخیر حوصلے کو سلام پیش کرتا ہوں۔ہر بے گھر خاندان اپنے اندر کشمیر کی زندہ چنگاری لیے ہوئے تھا۔ جدوجہد اور مصیبت کی بھٹی میں انہوں نے فلسفہ، روحانیت، ثقافت، زبان اور روایات کو محفوظ رکھا۔ اذیت کے باوجود انہوں نے امکانات تلاش کیے اور کامیابی کی نئی بلندیاں حاصل کیں‘‘۔
سنہا نے۲۰۲۱میں کشمیری مہاجر ویب پورٹل کے آغاز کا ذکر کیا جس کا مقصد کشمیری پنڈت برادری کے قبضہ شدہ مکانات اور زمینوں کی بازیابی ہے۔انہوں نے کہا’’میں پختہ یقین رکھتا ہوں کہ دنیا کے سب سے بڑے دکھوں میں سے ایک اپنے ہی وطن میں اجنبی بن جانا ہے۔ جموں و کشمیر میں یہی ہوا تھا‘‘۔
لیفٹیننٹ گورنر نے مزید کہا کہ۱۹۸۹۔۱۹۹۰میں دہشت گردوں کے ہاتھوں کشمیری پنڈتوں کے قتل عام کا درد اتنا گہرا ہے کہ وقت بھی اسے کم نہیں کر سکا۔انہوں نے کہا’’راتوں رات گھر چھوڑنے اور جڑوں سے اکھڑ جانے کی اذیت آج بھی بے گھر خاندانوں کی رگوں میں کانٹوں کی طرح چبھتی ہے‘‘۔
نوجوانوں سے اپیل کرتے ہوئے کہ وہ دہشت گردوں کے مظالم کبھی نہ بھولیں، سنہا نے کہا’’نئی نسل کو یہ بھی یاد رکھنا چاہیے کہ پاکستان کی پشت پناہی میں دہشت گردوں نے ہزاروں بے گناہ کشمیری مسلمانوں کا خون بھی بہایا ہے۔ کئی واقعات اتنے دردناک ہیں کہ بیان سے باہر ہیں۔گزشتہ سال سے ان خاندانوں تک انصاف پہنچنا شروع ہوا ہے اور ان کی روزگار ضروریات سمیت دیگر ضروریات پوری کرنے کی کوششیں جاری ہیں‘‘۔
ایل جی نے کہا کہ اگست۲۰۱۹میں وزیر اعظم مودی کی جانب سے دفعہ۳۷۰کے خاتمے نے امید پیدا کی کہ کشمیری پنڈت برادری کی نئی نسل بغیر خوف کے اپنی جڑیں دوبارہ حاصل کر سکے گی۔
سنہا نے کہا کہ جو لوگ جموں و کشمیر کے عوام کے خوابوں اور امنگوں کو تباہ کرنے کی کوشش کریں گے انہیں ’’خاک میں ملا دیا جائے گا‘‘۔
ایل جی نے کہا کہ سیکورٹی فورسز دہشت گردی کے ماحولیاتی نظام کو ختم کرنے کے لیے پُرعزم ہیں مگر معاشرے کو بھی دہشت گرد ہمدردوں کے خلاف کھڑا ہو کر اس لڑائی میں شامل ہونا ہوگا۔
لیفٹیننٹ گورنر کاکہنا تھا’’دہشت گردی میں ملوث افراد کو ختم کرنے کی کوششیں کی جا رہی ہیں۔ انہیں ایسی سزا دی جائے گی کہ ان کی سات نسلیں یاد رکھیں گی‘‘۔
سنہا نے مزید کہا’’سزا ایسی ہونی چاہیے کہ دہشت گردی میں ملوث افراد معافی مانگنے پر مجبور ہو جائیں‘‘۔
لیفٹیننٹ گورنر نے کہا کہ مرکز کے زیر انتظام علاقے میں امن، ترقی، خوشحالی اور پیش رفت کو یقینی بنانے کے لیے مسلسل کوششیں کی جا رہی ہیں جس سے امن مخالف عناصر بے چین ہو گئے ہیں۔
سنہا نے کہا’’جموں و کشمیر میں دہشت گردی کے خاتمے کو یقینی بنانے کے لیے پولیس اور سیکورٹی فورسز نے قربانیوں کی طویل زنجیر پیش کی ہے‘‘۔
