آشا ورکروں کا سری نگر میں اپنے مطالبوں کو لے کر احتجاج

سرینگر: آشا ورکروں نے منگل کے روز یہاں پریس کالونی میں جمع ہو کر اپنے مطالبات خاص کر ماہانہ اجرتوں میں اضافے کے لئے احتجاج درج کیا۔
احتجاجی خواتین ’’آشا جب تک تنگ رہے گی، جنگ رہے گی جنگ رہے گی‘ جیسے نعرے لگا رہی تھیں۔
اس موقع پر ایک ورکر نے میڈیا کو بتایا’’اسمبلی کا بجٹ اجلاس چل رہا ہے، ہم چاہتے ہیں کہ ہمیں منیمم ویجز ایکٹ کے دائرے میں لایا جائے اور ہمیں بھی ورکر کا درجہ دیا جائے‘‘۔
انہوں نے کہا کہ جو اجرت ایک آشا کو ملک کی دیگر ریاستوں میں دی جا رہی ہے وہیں ہمیں بھی ملنی چاہئے۔
ان کا کہنا تھا’’ہمیں ماہانہ دو ہزار رپویے دئے جاتے ہیں جس سے گھر کا خرچہ پورا نہیں ہوتا ہے، اگر یہ دو ہزار روپیے بچے کو دئے جائیں تو وہ صرف دو گھنٹوں میں اس کو خرچ کرے گا‘‘۔
احتجاجیوں نے کہا کہ اگر رواں بجٹ اجلاس کے دوران ان کے مطالبوں کو پورا نہیں کیا گیا تو وہ سڑکوں پر آکر احتجاج درج کریں گے۔