سوپور میں کم عمر ڈرائیونگ کےخلاف کارروائیاں، تین گاڑیاں ضبط

سرینگر: شمالی کشمیر کے سوپور میں کم عمر ڈرائیونگ کے بڑھتے ہوئے رجحان کے خلاف سخت کارروائی عمل میں لاتے ہوئے تین معاملات میں عدالت نے گاڑیوں کی رجسٹریشن معطل کی ہے ۔
پولیس بیان کے مطابق تین موٹر گاڑیاں کم عمر ڈرائیوروں کے قبضے میں چلتی ہوئی پائی گئیں۔ پولیس نے موقع پر گاڑیاں ضبط کیں اور موٹر وہیکل ایکٹ کی متعلقہ دفعات کے تحت معاملہ ڈسٹرکٹ مجسٹریٹ موبائل مجسٹریٹ ٹریفک سوپور کی عدالت میں پیش کیا۔
عدالت نے تمام تینوں کیسز میں رجسٹرڈ مالکان‘ یعنی والدین کو قصوروار ٹھہرایا اور قانون کے مطابق سخت کارروائی کرتے ہوئے گاڑیوں کی رجسٹریشن۱۲ماہ کے لیے معطل کرنے کا حکم صادر کیا۔
عدالت نے قصوروار والدین کو پروبیشن پر رہا کیا جبکہ متعلقہ اے آر ٹی او کو یہ ہدایت بھی دی گئی کہ ان تینوں کم عمر ڈرائیوروں کو۲۵سال کی عمر تک ڈرائیونگ لائسنس جاری نہ کیا جائے ۔
پولیس نے والدین اور سرپرستوں سے سخت اپیل کرتے ہوئے کہا ہے کہ کم عمر ڈرائیونگ کی اجازت دینا نہ صرف قانون شکنی ہے بلکہ بچوں کی زندگی اور عوامی سلامتی کو شدید خطرات لاحق کرتا ہے ۔
پولیس نے واضح کیا کہ ٹریفک قوانین کی خلاف ورزی، خاص طور پر کم عمر ڈرائیونگ کے معاملات میں، زیرو ٹالرنس پالیسی برقرار رکھی جائے گی۔
حکام نے کہا کہ یہ کارروائی عوامی بیداری اور والدین کی ذمہ داری کو اجاگر کرنے کی ایک کوشش ہے تاکہ سڑکوں پر نظم و ضبط، قانون کی پاسداری اور شہریوں کی جان و مال کا تحفظ یقینی بنایا جا سکے ۔
پولیس نے عوام سے اپیل کی ہے کہ وہ کم عمر ڈرائیونگ کی اجازت نہ دیں اور ٹریفک قوانین کے نفاذ میں پولیس کے ساتھ مکمل تعاون کریں، تاکہ سوپور میں محفوظ اور منظم ٹریفک نظام کو فروغ دیا جا سکے ۔