کہیے صاحب آپ وہ کہیے جو آپ کہنا چاہتے ہیں کہ آپ کو بھی اپنی بات کہنے کا حق ہے …….. سو فیصد ہے ۔اور یہ بھی صحیح ہے کہ آپ کے منہ میں اللہ میاں نے جو بغیر ہڈی کے گوشت کا ٹکڑا دیا ہے …….. اسے عنایت کیا ہے ‘ اس لئے کیا ہے کہ آپ بغیر ہڈی کے گوشت کے اس ٹکڑے کا استعمال کریں ……..اس لئے صاحب آپ کیجئے ……..اس کا استعمال کیجئے ‘ ہم آپ کو روکیں گے اور نہ ٹوکیں گے ……..اجی ہم ہوتے کون ہیں آپ کو روکنے اور ٹوکنے والے……..لیکن صاحب یہ کیا بات ہوئی کہ آپ اِدھر اُدھر سے گھوم پھر کے سارا کا سارا الزام کشمیریوں پر ڈال دیں ……..اپنے ہر ایک مسئلہ ‘ ہر ایک مشکل کیلئے آپ کشمیریوں کو ذمہ دار ٹھہر ا دیں…….. نہیں صاحب یہ ٹھیک نہیں ہے اور ہاں مناسب بھی نہیں ۔ آپ کہہ دیجئے کہ عمرعبداللہ کی سرکار نکمی ہے ‘ہمیں کوئی اعتراض نہیں ……..آپ کہہ دیجئے کہ اس سرکار سے کوئی کام نہیں ہوپا رہا ہے ‘ آپ کہہ دیجئے کہ یہ سرکار……..عمرعبداللہ سرکار جموں دشمن ہے ‘ یہ جموںکاکچھ بھلا نہیں کر سکتی ہے ……..اس سے جموں کے حوالے سے کسی بہتری یا اچھائی کی کوئی امید نہیں کی جا سکتی ہے ……..آپ یہ سب کہیں ‘ ہم حلفاً کہتے ہیں کہ ہم اُف تک نہیں کریں گے کہ ……..کہ آپ کو ایسا کہنے کا حق ہے ‘ایسا حق جو ہم نہیں چھین سکتے ہیں …….. بالکل بھی نہیں چھین سکتے ہیں …….. لیکن صاحب یہ کیا بات ہو ئی کہ آپ یہ کہہ دیں کہ جموں میں اس وقت تین لاکھ ……..جی ہاں تین لاکھ کشمیری موجود ہیں اور……..اور شہر میں اگر آٹھ دس گھنٹے کی بجلی کٹوتی ہو تی ہے تو اس لئے ہوتی ہے کیونکہ یہ ساری بجلی انہیں دی جا رہی ہے ……..آپ کہہ دیجئے کہ جموں میں پینے کے پانی کی قلت ہے …….. لیکن یہ نہ کہہ دیجئے کہ شہر کا پانی ان تین لاکھ کشمیریوں کو دیا جارہا ہے ……..صاحب کیا یہ تین لاکھ کشمیری جموں میں کسی خاص جگہ ایک ساتھ رہ رہے ہیں جوبجلی اور ہانی کا رخ ان کی جانب موڈ دیا گیا ہے ؟ارے صاحب اول تو تین لاکھ کشمیری جموں میں موجود نہیں ہیں اور اگر ہیں بھی تو جموں کے مختلف علاقوں اور محلوں میں ہیں ……..اگر ان علاقوں کو بجلی مل رہی تو کشمیریوں کو بھی مل رہی ہے……..اگر نہیں مل رہی ہے تو کشمیریوں کو بھی نہیں مل رہی ہے……..ایسا تو نہیں ہے کہ محلے میں جس کرایہ کے گھر میں کشمیری ہیں صرف اسی گھر کو بجلی دی جا رہی ہے ‘ باقی محلے کو اندھیرے میں رکھا جارہا ہے ۔ صاحب !یہ کیا بات ہو ئی ……..بغیر ہڈی کے گوشت کا استعمال کیجئے ‘ لیکن صحیح اور سوچ سمجھ کر کیجئے ۔ ہے نا؟
جموں کے مسئلے اور کشمیری
