یومِ جمہوریہ پریڈ:کرتویہ پتھ پر۳۰جھانکیاں پیش کی جائیں گی

سرینگر: یومِ جمہوریہ کے موقع پر۲۶جنوری کو دہلی کے کرتویہ پتھ پر کم از کم۳۰جھانکیاں (ٹیبلو) پیش کی جائیں گی، جو بھارت کے بھرپور ثقافتی ورثے اور ترقیاتی کامیابیوں کی دلکش عکاسی کریں گی۔
یہ جھانکیاں دو مرکزی موضوعات کے تحت پیش کی جائیں گی:’سوتنترتا کا منتر وندے ماترم‘ اور ’سمردھی کا منتر آتم نربھر بھارت‘۔ اس کے ساتھ ساتھ قومی نغمہ وندے ماترم کے۱۵۰سال مکمل ہونے کی مناسبت بھی منائی جائے گی۔
مجموعی طور پر۳۰جھانکیوں میں سے۱۷ ریاستوں اور مرکز کے زیرِ انتظام علاقوں کی ہوں گی، جبکہ۱۳مختلف مرکزی وزارتوں، محکموں اور خدمات کی جانب سے پیش کی جائیں گی۔
کئی ریاستیں اپنی منفرد ثقافتی شناخت اور ترقیاتی کہانیوں کو اجاگر کریں گی۔ آسام کی جھانکی میں کاریگری کے گاؤں آشیراکنڈی کو نمایاں کیا جائے گا، جبکہ گجرات اور چھتیس گڑھ وندے ماترم کے موضوع کی ترجمانی کریں گے۔ مہاراشٹر اپنی جھانکی میں گنیش اُتسو کو آتم نربھرتا کی علامت کے طور پر پیش کرے گا، جبکہ مغربی بنگال بھارت کی آزادی کی تحریک میں بنگال کے کردار کو اجاگر کرے گا۔
روایت اور جدت کا امتزاج کئی جھانکیوں کا نمایاں پہلو ہوگا۔ اڑیسہ کی ’سوائل ٹو سلیکون‘ جھانکی روایت میں جڑی ترقی کی عکاسی کرے گی، تمل ناڈو بھارت کے ایک ای وی (الیکٹرک وہیکل) مینوفیکچرنگ مرکز کے طور پر ابھرتے کردار کو پیش کرے گا، جبکہ کیرالہ اپنی واٹر میٹرو اور۱۰۰فیصد ڈیجیٹل گورننس کے اقدامات کو نمایاں کرے گا۔ ناگالینڈ کی جھانکی ہارن بل فیسٹیول کو ثقافت، سیاحت اور خود انحصاری کی علامت کے طور پر پیش کرے گی۔
مرکزی وزارتوں میں وزارتِ ثقافت کی جھانکی ’وندے ماترم:ایک قوم کی روح کی پکار‘ مرکزی موضوع کی نمائندگی کرے گی، جبکہ محکمۂ امورِ عسکریات آپریشن سندور پر مبنی تینوں افواج کی مشترکہ جھانکی پیش کرے گا، جو باہمی ہم آہنگی اور اتحاد کی علامت ہوگی۔
وزارتِ ہاؤسنگ و شہری امور کی جانب سے پیش کی جانے والی پھولوں سے سجی جھانکی وندے ماترم کے۱۵۰سال مکمل ہونے کی یاد میں ہوگی۔
ان جھانکیوں کے ساتھ تقریباً۲۵۰۰ فنکاروں کی ثقافتی پیشکشیں بھی ہوں گی، جو یومِ جمہوریہ پریڈ۲۰۲۶کو بھارت کے ورثے، اتحاد اور ترقی کا ایک رنگا رنگ اور شاندار مظاہرہ بنائیں گی۔
اس سال یومِ جمہوریہ پریڈ کے مہمانِ خصوصی یورپی کونسل کے صدر انتونیو کوسٹا اور یورپی کمیشن کی صدر ارسولا فان ڈیر لیئن ہوں گی۔ (ایجنسیاں)