تحصیل آفس شالٹینگ کا کلرک۲ہزار روپے رشوت لیتے گرفتار

سرینگر: جموں کشمیر اینٹی کرپشن بیورو نے تحصیل آفس سنٹرل شالٹینگ، سرینگر میں تعینات ایک کلرک کو۲ہزار روپے کی رشوت لیتے ہوئے رنگے ہاتھوں گرفتار کیا ہے ۔ بیورو کے مطابق گرفتار ملزم کی شناخت لائق احمد ناتھ ساکن قمرواری سرینگر کے طور پر ہوئی ہے ۔
اے سی بی کے بیان میں کہا گیا کہ بیورو کو ایک شہری کی جانب سے تحریری شکایت موصول ہوئی تھی، جس میں الزام لگایا گیا کہ شکایت گزار کو متعلقہ بی این ایس ایس کے تحت ایگزیکٹیو مجسٹریٹ فرسٹ کلاس شالٹینگ کے احکامات پر احتیاطی کارروائی کے طور پر درجہ بند کیا گیا تھا۔ شکایت کے مطابق، اسی ریکارڈ کو سرکاری رجسٹروں سے حذف کرنے کے عوض متعلقہ کلرک نے۲ہزار روپے رشوت کا مطالبہ کیا۔
شکایت گزار نے رشوت کی ادائیگی سے انکار کرتے ہوئے معاملہ اے سی بی کے نوٹس میں لایا اور تحریری طور پر کارروائی کی درخواست کی۔ شکایت کی وصولی کے بعد بیورو نے خفیہ جانچ کی جس میں رشوت طلب کرنے کی تصدیق ہوئی۔ اس کے بعد پولیس اسٹیشن اے سی بی سرینگر میں ایف آئی آر درج کرکے باقاعدہ تحقیقات شروع کی گئی۔
تحقیقات کے دوران ایک خصوصی ٹیم تشکیل دی گئی، جس نے کاروائی کرتے ہوئے لائق احمد ناتھ کو۲ہزار روپے رشوت لیتے ہوئے رنگے ہاتھوں گرفتار کر لیا۔ اے سی بی کے مطابق، ملزم کو موقع پر ہی حراست میں لیا گیا اور تمام ضروری لیگل کارروائیاں مکمل کی گئیں۔
بیورو نے بتایا کہ معاملے کی مزید تفتیش جاری ہے اور رشوت ستانی کے اس معاملے میں مزید حقائق سامنے لائے جا رہے ہیں۔