اونتی پورہ میں غیر قانونی کان کنی کے خلاف کارروائی‘۲ٹریکٹر ضبط

اونتی پورہ پولیس نے قدرتی وسائل کے تحفظ کو یقینی بنانے کیلئے غیر قانونی کان کنی کی سرگرمیوں کے خلاف اپنی مہم تیز کر دی ہے ۔
ایک پولیس ترجمان نے اپنے ایک بیان میں کہا کہ مخصوص اطلاع پر کارروائی کرتے ہوئے پولیس اسٹیشن اونتی پورہ کی ایک ٹیم نے چرلی گنڈ اونتی پورہ میں غیر قانونی ریت نکالنے کے خلاف آپریشن انجام دیا۔
ترجمان نے کہا کہ کارروائی کے دوران یہ بات سامنے آئی کہ بعض افراد قوانین اور ماحولیاتی ضوابط کی خلاف ورزی کرتے ہوئے لیولرز سے لیس ٹریکٹروں کے ذریعے بڑی مقدار میں غیر قانونی طور پر ریت نکالنے میں ملوث تھے ۔
ملوث افراد کی شناخت سمیع احمد صوفی ولد غلام محمد صوفی ساکن کدلہ بل اونتی پورہ، شبیر احمد صوفی ولد غلام قادر صوفی، مشتاق احمد لون ولد عبد السلام لون، شبیر احمد لاوے ولد علی محمد لاوے ، رمیز احمد لاوے ولد غلام حسن لاوے ، شکیل احمد صوفی ولد عبداللہ صوفی اور بشیر احمد صوفی ولد مرحوم غلام محمد صوفی ساکنان چرلی گنڈ اونتی پورہ کے طور پر کی گئی۔
پولیس ترجمان نے بتایا کہ کارروائی کے دوران دو ٹریکٹر ریت سمیت ضبط کئے گئے ۔انہوں نے کہا کہ اس ضمن میں متعلقہ قانونی دفعات کے تحت مزید کارروائیاں انجام دی جا رہی ہیں۔