لیفٹیننٹ جنرل شکلا کے نام سے وائرل ویڈیو جعلی: فوج

نئی دہلی، 29 اکتوبر (یواین آئی) فوج نے لیفٹیننٹ جنرل نیرج شکلا کے نام سے سوشل میڈیا پر وائرل ہونے والی ایک ویڈیو کو ڈیجیٹل طور پر چھیڑ چھاڑ کرکے تیار کی گئی جعلی ویڈیو قرار دیا ہے۔ فوج نے اس معاملے میں پاکستان میں موجود سوشل میڈیا ہینڈلز کو ملوث بتایا ہے۔
فوج نے جمعرات کو سوشل میڈیا پلیٹ فارم ایکس پر ایک پوسٹ کے ذریعے اس ویڈیو کی حقیقت واضح کرتے ہوئے بتایا کہ یہ گزشتہ سال اکتوبر کی ایک پرانی ویڈیو ہے، جس میں تبدیلیاں کرکے لیفٹیننٹ جنرل شکلا سے منسوب جھوٹے بیانات شامل کیے گئے ہیں۔ ان بیانات میں دعویٰ کیا گیا ہے کہ چین کی جدید فوجی ٹیکنالوجی اور اروناچل پردیش میں اس کی بڑھتی ہوئی موجودگی کا مقابلہ کرنے میں ہندوستان کو مشکلات کا سامنا ہے۔
فوج کے مطابق، ویڈیو میں یہ دعویٰ بھی کیا گیا ہے کہ حکومت ہندوستانی فوج کے بجائے اپنے مفادات کو ترجیح دیتی ہے اور پرانے ساز و سامان کی وجہ سے فوجیوں کو نقصان اٹھانا پڑ رہا ہے اور انہیں مایوسی کا سامنا ہے۔ فوج نے ان بیانات کو جعلی قرار دیتے ہوئے واضح کیا کہ یہ حقیقت پر مبنی نہیں ہیں۔
فوج کی جانب سے جاری کردہ فیکٹ چیک کے مطابق، پاکستان میں موجود گمراہ کن پروپیگنڈے سے وابستہ سوشل میڈیا ہینڈلز اس چھیڑ چھاڑ شدہ ویڈیو کو پھیلا رہے ہیں۔ اس کا مقصد ہندوستان اور چین کی سرحد سے متعلق حساس معاملات کو استعمال کرتے ہوئے فوج اور حکومت پر عوام کے اعتماد کو کمزور کرنا ہے۔
فوج نے واضح کیا ہے کہ یہ ایک پرانی ویڈیو ہے، جس میں ڈیجیٹل تبدیلیاں کرکے فرضی بیانات شامل کیے گئے ہیں۔ لہٰذا ویڈیو میں لیفٹیننٹ جنرل شکلا سے منسوب دعوؤں کو درست نہیں سمجھا جانا چاہیے۔