سرینگر:منشیات کے اسمگلر کی ڈیڑھ کروڑ روپے مالیت کی جائیداد ضبط

سرینگر پولیس نے منشیات کے ایک بدنام اسمگلر کی تقریباً ڈیڑھ کروڑ روپے مالیت کی غیر منقولہ جائیداد کو نارکوٹک ڈرگز اینڈ سائیکو ٹراپک سبسٹینسز (این ڈی پی ایس) ایکٹ کے تحت ضبط کر لیا ہے۔ یہ کارروائی پولیس اسٹیشن شالٹینگ میں درج ایک مقدمے کے سلسلے میں عمل میں لائی گئی۔
پولیس کے مطابق یہ اقدام ایف آئی آر نمبر۷۵/۲۰۲۵کے تحت دفعہ ۸/۲۰؍؍اور۲۹؍ این ڈی پی ایس ایکٹ کے تحت درج مقدمے کی تفتیش کے دوران کیا گیا۔ یہ کارروائی این ڈی پی ایس ایکٹ کے باب پنجم اے کے تحت کی گئی ایک مفصل مالی جانچ کے بعد سامنے آئی۔
پولیس بیان میں کہا گیا ہے کہ تفتیش کے دوران ملزم اور اس کے اہلِ خانہ کے اثاثوں کی جامع جانچ کی گئی۔ ریونیو ریکارڈ، جائیداد سے متعلق دستاویزات، فیلڈ ویریفکیشن رپورٹس، تخمینہ جاتی معلومات اور متعلقہ افراد کے بیانات کا تفصیلی جائزہ لینے سے یہ بات سامنے آئی کہ۲۰۱۹۔۲۰۱۸ کے دوران تعمیر کیا گیا دو منزلہ رہائشی مکان منشیات کی غیر قانونی تجارت سے حاصل شدہ رقم سے تعمیر کیا گیا تھا۔
تحقیقات میں یہ بھی ثابت ہوا کہ ملزم اور اس کے اہلِ خانہ کی معلوم اور قانونی آمدنی اس جائیداد کے حصول اور تعمیر کیلئے ناکافی تھی۔ پولیس کے مطابق رقم کے ذرائع غیر واضح، آمدنی سے غیر متناسب اور براہِ راست منشیات سے متعلق سرگرمیوں سے جڑے ہوئے پائے گئے۔
اس بنیاد پر این ڈی پی ایس ایکٹ کی دفعہ ۶۸ایف کے تحت جائیداد کو منجمد کرنے کے احکامات جاری کیے گئے ہیں، جن کے تحت اس جائیداد کی فروخت، منتقلی، رہن یا کسی بھی تیسرے فریق کے حق کے قیام پر آئندہ احکامات تک پابندی عائد رہے گی۔ منجمدی کے احکامات متاثرہ افراد کو آزاد گواہوں کی موجودگی میں باضابطہ طور پر سونپ دیے گئے۔
سری نگر پولیس نے منشیات کے خلاف اپنی زیرو ٹالرنس پالیسی کو دہراتے ہوئے کہا ہے کہ منشیات کی غیر قانونی تجارت کے مالی ڈھانچے کو توڑنے کے لیے ایسی سخت قانونی کارروائیاں، بشمول غیر قانونی طور پر حاصل شدہ جائیدادوں کی ضبطی اور منجمدی، آئندہ بھی جاری رہیں گی۔
ادھر گاندربل میں پولیس نے دو منشیات فروشوں کی گرفتاری عمل میں لا کر ان کے قبضے سے دس کروڑ روپے مالیت کی کوکین برآمد کی ہے ۔
پولیس ترجمان کے مطابق ۸دسمبر کو گاندربل میں ناکہ چیکنگ کے دوران محمد عرفان بٹ ولد غلام نبی بٹ، ساکن خار باغ واکورہ گاندربل، کو حراست میں لیا گیا اور اس کے خلاف پولیس اسٹیشن گاندربل میں این ڈی پی ایس ایکٹ کے تحت کیس درج کرکے تحقیقات شروع کی گئی۔
ترجمان نے کہا کہ ملزم کے روابط اور نیٹ ورک کی تحقیقات کے لیے ایس ایس پی گاندربل خلیل پسوال کی نگرانی میں ایڈیشنل ایس پی اویس لون کی سربراہی میں ایک خصوصی تحقیقاتی ٹیم تشکیل دی۔
عدالت سے حاصل شدہ سرچ وارنٹس کے تحت گاندربل پولیس نے سمبل، شادی پورہ، زکورہ اور دیگر مشتبہ مقامات پر ہم آہنگ چھاپے مار کر منشیات کے نیٹ ورک کو نشانہ بنایا۔
ترجمان کے مطابق اس کارروائی کے دوران ایک اور خطرناک منشیات فروش مقصود حسین خان ولد عبد المجید خان، ساکن حضرت بل، سری نگر، حال گوری پورہ صنعت نگر کو گرفتار کیا گیا۔ اس کے کرایہ کے مکان کی تلاشی کے دوران تقریباً ایک کلوگرام کوکین جیسا نشہ آور مادہ برآمد ہوا، جس کی بین الاقوامی منڈی میں مالیت ۱۰کروڑ روپے سے زائد ہے ۔ علاوہ ازیں ایک گاڑی، موبائل فونز اور دیگر الیکٹرانک آلات بھی ضبط کیے گئے ۔
پولیس نے بتایا کہ تحقیقات جاری ہیں تاکہ منشیات کے اصل ماخذ، سپلائی چین اور ممکنہ بین ضلعی اور بین الاقوامی روابط کا پتہ لگایا جا سکے ۔
گاندربل پولیس نے واضح کیا کہ منشیات کی اسمگلنگ کے خلاف ان کی صفر رواداری کی پالیسی برقرار ہے اور عوام سے اپیل کی گئی ہے کہ وہ منشیات کے استعمال یا فروخت سے متعلق کسی بھی معلومات کو پولیس کے ساتھ شیئر کر کے ایک منشیات سے پاک سماج کی تشکیل میں تعاون کریں۔