ترواننت پورم، 22 نومبر (یو این آئی) کیرالہ کے ڈرگس کنٹرول ڈپارٹمنٹ (کے ڈی سی ڈی) نے نسخہ تجویز کے بغیر آن لائن ادویات کی فروخت پر ایک کمپنی کے خلاف قانونی کارروائی شروع کی ہے ۔
عہدیداروں نے اس بات کا پتہ لگایا کہ جے جے میڈیکلس کمپنی مینفورس 50، مینفورس 100، اور ویگور 100 گولیاں، قوت باہ بڑھانے والی دوائیں، کسی نسخہ تجویز یا درست خریداری بل کے بغیر آن لائن فروخت کر رہی ہے ، جس کے بعد حکام نے جے جے میڈیکلس کے خلاف کارروائی کی جو پوشاریپاڈی، شمالی پاروور میں واقع ہے ۔
یہ آپریشن اس وقت شروع کیا گیا جب محکمہ کے اہلکار نے کمپنی کی ویب سائٹ کے ذریعے ڈاکٹر کے نسخہ کے بغیر آن لائن آرڈر دیا اور بغیر کسی پریشانی کے ادویات موصول ہوگئیں۔ ویب سائٹ پر فراہم کردہ ایڈریس فرضی تھا جس سے تفتیش مشکل ہو رہی تھی۔ ٹیم نے آخر کار ذرائع کا سراغ لگایا اور چھاپہ مارا۔
ضبط کی جانے والی تمام ادویات اور دستاویزات کو شمالی پاروور جوڈیشل فرسٹ کلاس مجسٹریٹ کورٹ میں جمع کرایا گیا ہے ۔
واضح رہے کہ کیرالہ کی وزیر صحت وینا جارج نے پہلے مرکزی وزارت صحت سے ریاست میں ادویات کی غیر قانونی آن لائن فروخت پر پابندی لگانے کی اپیل کی تھی اور ڈرگس کنٹرول ڈپارٹمنٹ کو سخت کارروائی کرنے کی ہدایت دی تھی۔
اس سے قبل کیرالہ میں اس طرح کی غیر قانونی آن لائن فروخت کی کوئی اطلاع نہیں ملی تھی۔ ضبط شدہ ادویات جنسی شہوت بڑھانے والی ادویات ہیں جن کا غلط استعمال کیا جا سکتا ہے ۔ شیڈول ایچ کے مطابق ایسی ادویات کی غیر قانونی فروخت سے صحت کو سنگین خطرہ لاحق ہو سکتا ہے ۔ یہ منشیات اور کاسمیٹکس ایکٹ 1940 کے تحت قابل سزا جرم ہے ۔
