سری نگر؍۳؍ اکتوبر
مرکزی وزارتِ توانائی کے سیکریٹری پنکج اگروال نے ہفتہ کو کہا کہ جموں و کشمیر نے مرکزی حکومت کی چھتوں پر شمسی توانائی کے نظام کی تنصیب سے متعلق اسکیم کے تحت اچھی شروعات کی ہے اور رفتار میں اضافہ ہوتے ہی یہاں اس شعبے میں تیزی سے پیش رفت متوقع ہے۔
پنکج اگروال نے یہاں راجباغ میں پردھان منتری سوریہ گھر مفت بجلی یوجنا کے تحت منعقدہ ’’سیوا سیتو ابھیان‘‘ کیمپ کا دورہ کیا۔
اس دورے کا مقصد عوامی رابطے کو مزید مضبوط بنانا، شہریوں کو مرکز پر مبنی خدمات کی فراہمی میں سہولت پیدا کرنا اور اسکیم کے تحت چھتوں پر شمسی توانائی کے نظام کی تنصیب کے فوائد کے بارے میں عوام میں بیداری پیدا کرنا تھا۔
صحافیوں سے گفتگو کرتے ہوئے سیکریٹری نے کہا کہ ملک بھر میں تقریباً۵۰ لاکھ افراد اس اسکیم سے استفادہ کر چکے ہیں۔
اگروال نے کہا، ’’مجھے خوشی ہے کہ جموں و کشمیر میں بھی اس سمت میں اچھی شروعات ہوئی ہے۔ جموں و کشمیر نے حال ہی میں۱۰۰میگاواٹ کا ابتدائی سنگ میل حاصل کیا ہے اور جیسے ہی رفتار میں اضافہ ہوگا، یہاں یقینی طور پر تیزی سے پیش رفت ہوگی۔‘‘
جموں و کشمیر میں پن بجلی کی صلاحیت سے استفادہ کرنے کے لیے مرکز کی جانب سے اٹھائے گئے اقدامات سے متعلق سوال کے جواب میں اگروال نے کہا کہ حکومت دریائے چناب پر کئی منصوبوں پر کام کر رہی ہے۔
اگروال نے کہا، ’’جموں و کشمیر کے ساتھ ہماری مشترکہ شراکت داری بھی ہے، جسے چناب ویلی پاور کارپوریشن لمیٹڈ کہا جاتا ہے۔ رَٹل، پکل ڈل، کیرو اور کوار جیسے بڑے منصوبوں پر پہلے ہی کام جاری ہے اور ان پر بہت اچھی پیش رفت ہو رہی ہے۔ ہمیں مرکز کے زیر انتظام علاقے کی انتظامیہ کی جانب سے ان منصوبوں کے لیے مکمل تعاون حاصل ہو رہا ہے۔‘‘
سیکریٹری نے کہا کہ مرکزی حکومت جموں و کشمیر میں شروع کیے جانے والے دیگر نئے منصوبوں پر بھی غور کرے گی۔
اگروال نے کہا، ’’فی الحال سواَل کوٹ منصوبے کے حوالے سے بات چیت جاری ہے۔ ہم یقیناً مستقبل قریب میں اس منصوبے پر کام شروع کرنے کا ارادہ رکھتے ہیں۔‘‘
سیکریٹری نے مزید کہا کہ یہ منصوبے نہ صرف مقامی بجلی کی ضرورت پوری کریں گے بلکہ ملک کے دیگر حصوں کی بجلی کی ضروریات پوری کرنے میں بھی معاون ثابت ہوں گے۔
۔۔۔۔۔۔۔(ایجنسیاں)
