سرینگر؍۸؍اکتوبر
کشمیر بھر کے دستکاروں اور ہنرمندوں کو مالی معاونت فراہم کرنے کے مقصد سے محکمہ دستکاری و ہینڈلوم نے رواں مالی سال کی پہلی دو سہ ماہیوں کے دوران کریڈٹ کارڈ اسکیم کے تحت۱۴ء۷۱کروڑ روپے کے قرضے جاری کیے ہیں۔
محکمہ کے مطابق بینکوں کو مجموعی طور پر۳۸۸۵ درخواستیں بھیجی گئیں، جن میں سے ستمبر۲۰۲۶ کے اختتام تک۱۳۳۲؍درخواستیں منظور کی گئیں، جبکہ۱۰۵۴ درخواست گزاروں کو قرضے جاری کیے جاچکے ہیں۔
محکمہ کے ترجمان نے بتایا کہ اس سہولت کو زیادہ سے زیادہ مستحقین تک پہنچانے کے لیے محکمہ سرکردہ بینکوں اور دیگر مالیاتی اداروں کے ساتھ مل کر کام کر رہا ہے۔ ان قرضوں کا مقصد کاریگروں کو اپنے یونٹ قائم کرنے، خام مال اور ضروری آلات خریدنے میں مدد فراہم کرنا ہے۔ انہوں نے کہا کہ دستکاری کا شعبہ بڑی حد تک محنت پر منحصر ہے اور مالی معاونت سے چھوٹے یونٹوں کو اپنے کاروبار کو مستحکم کرنے میں مدد ملے گی۔
ترجمان نے بتایا کہ اسکیم کے تحت مستحقین کو پانچ سال تک بتدریج کم ہونے والی شرح پر۷ فیصد سود میں رعایت بھی دی جاتی ہے، تاکہ نئے یونٹ بتدریج خود کفیل ہوسکیں۔
ترجمان نے کہا کہ۲۰۲۰ میں قرض کی حد ایک لاکھ سے بڑھا کر دو لاکھ روپے کیے جانے کے بعد اون کی پروسیسنگ، ہینڈلوم اور دستکاری پالیسی کے تحت اب تک۱۰ ہزار سے زائد کاریگروں کو مجموعی طور پر۱۵۱کروڑ روپے کے قرضے فراہم کیے جاچکے ہیں۔
اس عرصے کے دوران محکمہ نے قرض حاصل کرنے والے یونٹ مالکان کو سہارا دینے کے لیے۱۹ کروڑ روپے کی سود میں رعایت بھی فراہم کی ہے۔
محکمہ کے مطابق اسکیم کا مقصد کاریگروں کا غیر رسمی قرضوں پر انحصار کم کرنے کے ساتھ ساتھ روایتی دستکاری کے شعبے کو مستحکم مالی بنیاد فراہم کرنا ہے۔ آلات، خام مال اور چھوٹے پیداواری یونٹوں کے لیے باضابطہ قرضوں تک آسان رسائی سے نہ صرف پیداوار میں اضافہ متوقع ہے بلکہ نوجوان نسل کو اس روایتی پیشے سے جوڑے رکھنے اور کشمیر کی دستکاری و ہینڈلوم معیشت کو مضبوط بنانے میں بھی مدد ملے گی۔
کاریگر اسکیم سے فائدہ اٹھانے کے لیے singlewindow.jk.gov.in پر آن لائن درخواست دے سکتے ہیں۔ مختلف اضلاع میں قائم کامن سروس سینٹرز بھی رجسٹریشن کے عمل میں معاونت فراہم کر رہے ہیں۔
ترجمان نے مالیاتی اداروں اور سرکردہ بینکوں پر زور دیا کہ وہ دستکاری کے شعبے کو ترجیحی قرضوں کے زمرے میں رکھتے ہوئے بروقت اور آسان شرائط پر قرض فراہم کریں، تاکہ چھوٹے یونٹ مالکان اپنی سرگرمیوں کو وسعت دے کر زیادہ مضبوط اور خود کفیل بنیاد قائم کرسکیں۔
۔۔۔۔۔۔۔ (ڈی آئی پی آر)
