سرینگر؍۸؍ اکتوبر
سرینگر کے بمنہ علاقے میں جمعرات کو پانتھہ چوک۔ پارمپورہ بائی پاس پر ایک مال بردار ٹرک اور فوجی گاڑی کے درمیان سڑک حادثہ پیش آیا، تاہم حادثے میں کسی کے زخمی ہونے کی اطلاع نہیں ہے۔
حکام کے مطابق راجستھان نمبر پلیٹ والے مال بردار ٹرک نے بمنہ کے مقام پر فوجی گاڑی کو پیچھے سے ٹکر مار دی، جس کے نتیجے میں فوجی گاڑی سڑک کے ڈیوائیڈر پر جا چڑھی۔
حکام نے بتایا کہ شہری گاڑی کے ڈرائیور نے ٹرک پر قابو کھو دیا، جس کے باعث ٹرک الٹ گیا۔
ادھر رام بن ضلع کے پوگل پریستان تحصیل میں سنا بتی کے قریب بدھ کی دیر رات ایک ٹاٹا سومو سڑک حادثے کا شکار ہوگئی، جس میں دو افراد ہلاک جبکہ سات دیگر شدید زخمی ہوگئے۔
پولیس کے مطابق ایک ٹاٹا سومو میں نو افراد سوار تھے اور گاڑی رات تقریباً۱۰ بجے سنا بتی سے چنٹھن کی جانب جا رہی تھی کہ راستے میں پھسل کر سڑک سے نیچے کھائی نما ڈھلان میں جا گری۔
حادثے میں ایک شخص کی موقع پر ہی موت ہوگئی، جبکہ آٹھ زخمیوں کو ابتدائی طور پر پرائمری ہیلتھ سینٹر اکھرال منتقل کیا گیا۔ بعد ازاں انہیں خصوصی علاج کے لیے اعلیٰ طبی مراکز منتقل کیا گیا۔
پولیس نے متوفی کی شناخت۳۰ سالہ وجے سنگھ ولد راج سنگھ، ساکن چنٹھن کے طور پر کی ہے۔
زخمیوں میں سونی چند‘ آنند سنگھ ‘ انیل چند‘ نریش سنگھ‘ جتندر سنگھ ‘رویندر سنگھ‘ سنیل سنگھ ‘ اور رویجیت سنگھ ‘ شامل ہیں۔ تمام زخمی چنٹھن، سنا بتی، تحصیل اکھرال پوگل پریستان، ضلع رام بن کے رہنے والے ہیں۔
پولیس کے مطابق سونی چند اور سنیل سنگھ کو جموں منتقل کیا گیا، جبکہ دیگر زخمیوں کو مزید علاج کے لیے جی ایم سی اننت ناگ منتقل کیا گیا۔ تاہم سنیل سنگھ نے جی ایم سی جموں میں زخموں کی تاب نہ لاتے ہوئے دم توڑ دیا، جس کے بعد حادثے میں ہلاکتوں کی تعداد دو ہوگئی۔
پولیس نے واقعے کا نوٹس لیتے ہوئے تحقیقات شروع کردی ہیں۔
مرکزی وزیر ڈاکٹر جتیندر سنگھ نے حادثے میں ہونے والی ہلاکتوں پر تعزیت کا اظہار کرتے ہوئے سوگوار خاندانوں کے ساتھ ہمدردی کا اظہار کیا ہے۔
۔۔۔۔۔۔(ویب ڈیسک)
