سرینگر/۲۳؍اکتوبر
جموں و کشمیر قانون ساز اسمبلی کے اسپیکر عبد الرحیم راتھر نے جمعرات کے روز ایوان میں اْس وقت سخت برہمی کا اظہار کیا جب معلوم ہوا کہ سابق ایم ایل اے لنگیٹ، محمد سلطان پنڈت پوری کا نام اسمبلی کی تعزیتی فہرست سے غائب ہے۔
ایوان میں تعزیتی قرارداد کے دوران اسپیکر نے ضلع انتظامیہ کپوارہ کو آڑے ہاتھوں لیتے ہوئے کہا کہ انتظامیہ کی لاپرواہی کے باعث اسمبلی سیکریٹریٹ کو سلطان پنڈت پوری کے انتقال سے متعلق بروقت اطلاع نہیں دی گئی۔
اسپیکر نے واضح الفاظ میں کہا:’ یہ نہایت غیر ذمہ دارانہ رویہ ہے۔ ضلع انتظامیہ کپواڑہ نے اسمبلی سیکریٹریٹ کو سابق رکنِ اسمبلی کے انتقال کی اطلاع دینے میں غفلت برتی، جو قابلِ افسوس ہے۔‘
راتھر نے کہا کہ اسمبلی کا یہ فریضہ ہے کہ وہ ان تمام سابق عوامی نمائندوں کو خراج عقیدت پیش کرے جنہوں نے اپنی زندگی کا ایک بڑا حصہ عوامی خدمت کے لیے وقف کیا۔ یہ ایوان اْن شخصیات کا احترام کرتا ہے جنہوں نے ریاست کی جمہوری تاریخ میں اپنا کردار ادا کیا۔
اسپیکر راتھر نے ہدایت دی کہ آئندہ اس نوعیت کی غفلت کو برداشت نہیں کیا جائے گا اور تمام ضلع ترقیاتی کمشنروں کو یہ ہدایت دی جائے گی کہ وہ ہر سابق رکن اسمبلی، وزیر یا عوامی نمائندے کے انتقال کی اطلاع فوری طور پر اسمبلی سیکریٹریٹ کو فراہم کریں تاکہ اْنہیں باضابطہ طور پر ایوان میں یاد کیا جا سکے۔
قابل ذکر ہے کہ وزیر اعلیٰ عمر عبداللہ نے بھی اجلاس کے دوران اسی مسئلے پر اظہار افسوس کیا تھا اور اسپیکر سے اپیل کی تھی کہ وہ سلطان پنڈت پوری کے نام کے حذف ہونے پر وضاحت طلب کریں۔
ایوان میں موجود دیگر اراکین نے بھی اسپیکر کے موقف کی تائید کرتے ہوئے کہا کہ اس طرح کی کوتاہی نہ صرف انتظامی ناکامی ہے بلکہ عوامی نمائندوں کے تئیں بے احترامی کے مترادف ہے۔
