سرینگر/۲۳ستمبر
جموں کشمیر کے نائب وزیر اعلیٰ‘سریندر کمار چودھری نے منگل کو گاندربل میں ترقیاتی منصوبوں کا جائزہ لیتے ہوئے سابق حکمران جماعت پی ڈی پی کو نشانہ بنایا۔ انہوں نے کہا کہ خصوصی درجے کی منسوخی کے بعد عوام کو مشکلات اور رکاوٹوں کا سامنا ہے ، جنہیں دور کرنا موجودہ حکومت کی اولین ترجیح ہے ۔
نائب وزیر اعلیٰ کا کہنا تھا کہ یونین ٹریٹری نظام میں بیک وقت دو حکومتیں چل رہی ہیں، جس کے باعث وسائل محدود ہیں تاہم عوامی مشکلات کے ازالے کیلئے اقدامات جاری ہیں۔
ان باتوں کااظہار موصوف نے گاندربل میں نامہ نگاروں سے بات چیت کے دوران کیا۔
چودھری نے کہا’’پی ڈی پی اور بی جے پی کے لیڈران عوام کو یہ تاثر دینے کی کوشش کر رہے ہیں کہ انہوں نے جموں و کشمیر کیلئے بہت کچھ کیا، مگر حقیقت یہ ہے کہ زمینی سطح پر ان کے دعوؤں میں کوئی صداقت نہیں۔ عوام آج بھی بنیادی سہولیات کے فقدان سے دوچار ہیں‘‘۔
نائب وزیر اعلیٰ نے کہا جموں کشمیر اس وقت یونین ٹیریٹری ہے جہاں دوہرا نظام کارفرما ہے ۔ ان کے مطابق ایک طرف لیفٹیننٹ گورنر کی قیادت میں انتظامیہ ہے جبکہ دوسری طرف منتخب نمائندے اپنی ذمہ داریاں نبھا رہے ہیں، تاہم محدود وسائل اور اختیارات کی کمی کی وجہ سے کئی رکاوٹیں درپیش ہیں۔
چودھری نے اس موقع پر کہا کہ موجودہ حکومت باوجود مشکلات کے عوامی فلاح و بہبود کے لئے کام کر رہی ہے ۔ یو ٹی نظام کے تحت اختیارات مکمل طور پر منتخب نمائندوں کے پاس نہیں ہوتے ، لیکن اس کے باوجود ہم عوامی مسائل کو حل کرنے اور ان کے دکھ درد بانٹنے کے لئے دن رات کوشاں ہیں۔
نائب وزیر اعلیٰ نے مزید کہا کہ نیشنل کانفرنس زمینی سطح پر لوگوں کے مسائل سن رہی ہے اور ان کے ازالے کیلئے عملی اقدامات کر رہی ہے ۔ انہوں نے کہا کہ گزشتہ حکومتوں نے جو کانٹے پیچھے چھوڑے ہیں، انہیں دور کرنا اور عوام کو راحت پہنچانا ہی ان کی حکومت کی اولین ترجیح ہے ۔
علاقے میں ترقیاتی کاموں کا جائزہ لینے کے بعد نائب وزیر اعلیٰ نے دعویٰ کیا کہ موجودہ حکومت بنیادی ڈھانچے کو بہتر بنانے ، سڑکوں، بجلی اور پانی کی فراہمی کو یقینی بنانے اور نوجوانوں کو روزگار کے مواقع فراہم کرنے پر خصوصی توجہ دے رہی ہے ۔
ان کا کہنا تھا ’’ہمیں عوام کے ساتھ کیے گئے وعدے یاد ہیں۔ مشکلات چاہے کتنی ہی ہوں، ہم ترقیاتی عمل کو آگے بڑھانے اور عوامی مشکلات کو کم کرنے کیلئے ہر سطح پر کام جاری رکھیں گے ۔ایجنسیز‘‘
