جسپریت بمراہ ہندوستان کے 36ویں ٹیسٹ کپتان

برمنگھم// ہندوستانی مرد کرکٹ ٹیم کے کپتان روہت شرماانگلینڈ کے خلاف جمعہ سے شروع ہونے والے پانچویں ٹیسٹ سے باہر ہو گئے ہیں۔
ان کی غیر موجودگی میں فاسٹ بولر جسپریت بمراہ ٹیم کی قیادت کریں گے۔ بورڈ آف کنٹرول فار کرکٹ ان انڈیا (بی سی سی آئی) نے جمعرات کو یہ اطلاع دی۔
یہ 28 سالہ بمراہ کے لیے کپتانی کا پہلا موقع ہوگا۔ اس سے پہلے انہوں نے کسی بھی سطح پر کپتانی نہیں کی ہے۔ اس کے علاوہ وہ پچھلی صدی میں کپل دیو کے بعد ہندوستان کی قیادت کرنے والے پہلے تیز گیند باز بن جائیں گے۔ بی سی سی آئی نے اس بات کی بھی تصدیق کی ہے کہ رشبھ پنت ٹیم کے نائب کپتان ہوں گے۔
بمراہ پٹودی ٹرافی میں 2-1 سے آگے چل رہی ہندوستانی ٹیم کے دوسرے کپتان ہوں گے۔ پہلے چار ٹیسٹ میچوں میں ورات کوہلی نے ٹیم کی کمان سنبھالی تھی۔ روہت کے ساتھ ساتھ، بمراہ گزشتہ سال ہندوستانی ٹیم کی اچھی کارکردگی میں ایک مضبوط کڑی تھے۔ ہندوستان کی جانب سے سیریز میں سب سے زیادہ وکٹ لینے والے بمراہ ایک سال بعد زیادہ تجربہ کار ہیں اور سری لنکا کے خلاف ہندوستان کی پچھلی ٹیسٹ سیریز میں نائب کپتان بھی تھے۔ اس وقت بمراہ نے کہا تھا کہ وہ متاثر ہیں اور مستقبل میں ہندوستان کی قیادت کی ذمہ داری لینے سے نہیں ہچکچائیں گے۔
بدھ کے روز، ہندوستان کے ہیڈ کوچ راہل دراوڈ نے بتایا تھا کہ ٹیم روہت پرحتمی فیصلہ کرنے سے پہلے زیادہ سے زیادہ انتظار کرنا چاہتی ہے۔ گزشتہ ہفتے لیسٹر شائر کے خلاف پریکٹس میچ کے دوسرے دن روہت کے کورونا سے متاثر ہونے کے بعد ان کے کھیلنے پر سوالیہ نشان لگ گیاتھا۔ پانچ دنوں تک آئیسولیشن میں رہنے کے بعد بھی بدھ اور جمعرات کو کیے گئے کورونا ٹیسٹ میں ان کی رپورٹ مثبت آئی۔
گزشتہ سال شروع ہونے والی پانچ میچوں کی ٹیسٹ سیریز درمیان میں اس وقت ملتوی کر دی گئی تھی جب ہندوستانی کیمپ کورونا کی زد میں آ گیا تھا۔
یہ واضح ہے کہ روہت کی غیر موجودگی ہندوستان کو کئی معنوں میں کھلے گی۔ ان کی قیادت کے علاوہ ہندوستان اپنے بہترین بلے باز کے بغیر اس میچ میں اترے گا۔ سیریز کے پہلے چار میچوں میں روہت اس وقت انگلینڈ کے ٹیسٹ کپتان جو روٹ کے بعد سب سے زیادہ رنز بنانے والے بلے بازتھے۔ اوول ٹیسٹ میں پلیئرآف دی میچ رہے روہت نے 52 سے زیادہ کی اوسط سے 368 رن بنائے تھے۔ اس دوران انہوں نے دو نصف سنچریاں اور ایک سنچری بھی بنائی۔ کے ایل راہل کے ساتھ مل کر، انہوں نے ہندوستان کو اچھی شروعات دلائی۔ تیز گیند بازی کے لیے سازگار حالات میں خود کو ڈھالنے کے علاوہ، روہت ہمیشہ بڑے رنز بنانے کے ارادے سے میدان میں اتر رہے تھے۔
ہندوستانی ٹیسٹ اسکواڈ: جسپریت بمراہ (کپتان)، شبھمن گل، ورات کوہلی، شریاس ائیر، ہنوما وہاری، چیتشور پجارا، رشبھ پنت (نائب کپتان-وکٹ کیپر)، کے ایس بھرت (وکٹ کیپر)، رویندرا جڈیجہ، روی چندرن اشون، شاردل ٹھاکر، محمد شامی، محمد سراج، امیش یادو، پرسدھ کرشنا، مینک اگروال۔