نومنتخب نائب صدر رادھا کرشنن

نائب صدر منتخب سی پی رادھا کرشنن کو جمعہ کے روز صدر دروپدی مرمو کے ہاتھوں عہدے کا حلف دلایا جانے کا امکان ہے۔
حکام نے کہا کہ صدر رادھا کرشنن کو ۱۲ ستمبر کو راشٹر پتی بھون میں منعقد ہونے والی ایک باضابطہ تقریب میں عہدے کا حلف دلانے والی ہیں۔
۶۷سالہ رادھا کرشنن نے منگل کے روز نائب صدر کا انتخاب جیتا۔انہوں نے مشترکہ اپوزیشن امیدوار بی سدھیرشن ریڈی کو ۱۵۲ ووٹوں کے فرق سے شکست دی۔
اس دوران کرشنن کو نائب صدر جمہوریہ منتخب ہونے پر بدھ کے روز دوسرے دن بھی نیک تمناؤں اور مبارکباد دینے کا سلسلہ جاری رہا۔ متعدد رہنماؤں اور دیگر معزز شخصیات نے ان سے ملاقات کر کے انہیں مبارکباد دی۔
صدر جمہوریہ دروپدی مرمو ، سابق نائب صدر جمہوریہ جگدیپ دھنکھڑ اور کانگریس کے صدر ملّیکارجن کھڑگے نے انہیں مبارکباد کا پیغام بھیج کر نیک تمنائیں پیش کیں۔ بھارتیہ جنتا پارٹی کے صدر جے پی نڈا، وزیر داخلہ امت شاہ، وزیر دفاع راجناتھ سنگھ، بھارتیہ جنتا پارٹی کے عہدیداروں اور کارکنوں نے بھی ان سے ملاقات کی اور مبارکباد دی۔
وزیر خزانہ نرملا سیتارمن، دہلی کی وزیر اعلیٰ ریکھا گپتا، دہلی اسمبلی کے اسپیکر وجیندر گپتا اور متعدد اراکین پارلیمنٹ و معزز شخصیات نے آج ان سے ملاقات کر کے مبارکباد اور نیک تمنائیں پیش کیں۔
اتر پردیش کے وزیر اعلیٰ یوگی آدتیہ ناتھ اور دیگر کئی ریاستوں کے وزرائے اعلیٰ نے بھی مبارکباد کے پیغامات بھیجے ہیں۔