ایل جی سنہااور وزیر اعلیٰ عمر کا کولگام میں جاں بحق فوجیوں کو خراج عقیدت

جموںکشمیر کے لیفٹیننٹ گورنر‘ منوج سنہا اور وزیر اعلیٰ ‘عمرعبداللہ نے منگل کے روز کولگام تصادم میں جاں بحق ہونے والے دو فوجی جوانوں کو خراج عقیدت پیش کیا۔
سنہا نے کہا کہ ان جوانوں کی بہادری اور انمول جذبے کو ہمیشہ یاد رکھا جائے گا۔
واضح رہے کہ کولگام کے گڈر جنگلاتی علاقے میں انکائونٹر کے دوران دو فوجی جوان جاں بحق جبکہ ایک زخمی ہوا تھا۔ جاں بحق فوجی جوانوں کی شناخت صوبیدار پربھات گور اور لانس نائک نریندر سندھو کے طور پر کی گئی تھی۔
فوجی ذرائع نے بتایا کہ اس انکائونٹر کے دوران۲دہشت گرد بھی ہلاک ہوئے تھے ۔
ایک سرکاری ترجمان نے بتایا’’لیفٹیننٹ گورنر نے بہادر فوجی جوانوں صوبیدار پربھات گور اور لانس نائیک نریندر سندھو کو خراج تحسین پیش کیا جنہوں نے کولگام میں دہشت گردوں کے خلاف جاری کارروائیوں میں عظیم قربانیاں دیں‘‘۔
سنہا نے کہا’’میرے خیالات سوگوار خاندانوں کے ساتھ ہیں۔ قوم اس مشکل گھڑی میں ان کے ساتھ کندھے سے کندھا ملا کر کھڑی ہے ‘‘۔ ان کا کہنا تھا کہ ان جوانوں کی قربانیوں کو ہمیشہ یاد رکھا جائے گا۔
اس دوران وزیر اعلیٰ عمر عبداللہ نے منگل کو کولگام میں اپنی جانیں گنوانے والے دو فوجی جوانوں کو یہاں ان کے اعزاز میں پھولوں کی چادر چڑھانے کی ایک تقریب کے دوران شاندار خراج عقیدت پیش کیا۔
عمرعبداللہ نے کہا کہ ان جوانوں کی مثالی ہمت، غیرمتزلزل بہادری اور لازوال قربانی کو ہمیشہ گہرے احترام اور تشکر کے ساتھ یاد رکھا جائے گا۔
وزیر اعلیٰ کے’ایکس‘ہینڈل پر ایک پوسٹ میں کہا گیا’’وزیر اعلیٰ نے آج کولگام میں اپنی جانیں گنوانے والے دو بہادر فوجی جوانوں کو پھولوں کی چادر چڑھانے کی تقریب میں شاندار خراج عقیدت پیش کیا‘‘۔
پوسٹ میں کہا گیا’’انہوں نے کہا کہ ان کی مثالی جرات، غیرمتزلزل بہادری اور لازوال قربانی کو ہمیشہ گہرے احترام اور تشکر کے ساتھ یاد رکھا جائے گا‘‘۔
فوج کی چنا کور نے بھی ان بہادر جوانوں کو شاندار خراج عقیدت پیش کیا ہے ۔
کور نے ’ایکس‘پر ایک پوسٹ میں کہا’’چنار کور صوبیدار پربھات گور اور لانس نائیک نریندر سندھو کی قوم کے لئے فرض کی ادائیگی میں پیش کی جانی والی عظیم قربانی کو خراج تحسین پیش کرتی ہے ، ان کی ہمت اور لگن ہمیشہ ہمیں متاثر کرتی رہے گی‘‘۔
انہوں نے کہا کہ فوج غمزدہ خاندانوں کے ساتھ گہری تعزیت اور یکجہتی کا اظہار کرتی ہے ۔