پانچ میڈیکل کالجوں کو ۱۹۰؍ اضافی ایم بی بی ایس سیٹیں ملیں گی

سرینگر/۳ستمبر
نیشنل میڈیکل کمیشن (این ایم سی) نے تعلیمی سال ۲۰۲۵۔۲۰۲۶ کیلئے جموں کشمیر کے پانچ میڈیکل کالجوں میں ۱۹۰؍ اضافی ایم بی بی ایس نشستوں کی منظوری دے دی ہے۔
یہ پیش رفت وزیر سکینہ اِیتو نے اعلان کی، جنہوں نے اس بات کو اجاگر کیا کہ یہ سنگ میل وزیر اعلیٰ عمر عبداللہ کی حمایت اور مداخلت سے حاصل کیا گیا ہے۔
سکینہ اِتو نے کہا، ’’یہ طبی تعلیم اور صحت کے بنیادی ڈھانچے کو مضبوط کرنے کی طرف ایک اہم قدم ہے۔‘‘
منظوری سے کالجوں کو آنے والے تعلیمی سیشن میں مزید طلبہ کو داخلہ دینے کی اجازت ملے گی، جو خطے کے طویل مدتی ہدف یعنی طبی تعلیم کو فروغ دینے اور صحت کے شعبے میں افرادی قوت کی کمی کو دور کرنے میں معاون ہوگا۔
حکام نے کہا کہ نشستوں میں اضافہ جموں و کشمیر میں طبی تعلیم کے معیار اور رسائی کو بہتر بنانے کی وسیع تر کوششوں کا حصہ ہے۔
نئی نشستیں خطے کے طبی طلبہ کو ایم بی بی ایس کی ڈگری حاصل کرنے کے زیادہ مواقع فراہم کریں گی، بغیر اس کے کہ انہیں جموں و کشمیر سے باہر جانا پڑے۔
منظوریوں میں گورنمنٹ میڈیکل کالج بارہمولہ، گورنمنٹ میڈیکل کالج ڈوڈہ اور گورنمنٹ میڈیکل کالج کٹھوعہ کیلئے ۵۰/۵۰؍ اضافی نشستیں شامل ہیں، جبکہ گورنمنٹ میڈیکل کالج جموں اور گورنمنٹ میڈیکل کالج سری نگر کو ۲۰/۲۰ نشستیں دی گئی ہیں۔ اس پیش رفت کے ساتھ، جموں و کشمیر کے گورنمنٹ میڈیکل کالجوں میں ایم بی بی ایس نشستوں کی کل تعداد ۱۱۸۵ سے بڑھ کر۱۳۷۵ ہوگئی ہے۔
حکام نے مزید اشارہ دیا ہے کہ تیسرے مرحلے کی کاؤنسلنگ سے پہلے مزید نشستوں کی منظوری متوقع ہے، جس سے جموں و کشمیر میں طبی تعلیم کی گنجائش مزید بڑھے گی۔
چیف سیکرٹری جموں و کشمیر نے اس سنگ میل کے حصول میں محکمہ صحت و طبی تعلیم کی مسلسل کوششوں کو سراہا ہے اور وزارت صحت و خاندانی بہبود، نیشنل میڈیکل کمیشن اور ڈاکٹر وی کے پال، ممبر نیتی آیوگ، کا رہنمائی اور حمایت پر شکریہ ادا کیا ہے۔
یہ قابل ذکر ہے کہ ڈاکٹر وی کے پال محکمہ صحت و طبی تعلیم جموں و کشمیر کے ساتھ کئی منصوبوں اور اصلاحات میں وابستہ ہیں، جو جموں و کشمیر کے صحت کے نظام میں انقلابی تبدیلیاں لانے کی توقع رکھتے ہیں۔
اس دوران ایل جی سنہا نے ایکس پر ایک بیان میں کہاہے’’ جموں کشمیر کے سرکاری میڈیکل کالجوں (جی ایم سیز) میں ایم بی بی ایس کی نشستیں بڑھانے اور جی ایم سیز میں ایم بی بی ایس کی کل نشستیں ۱۱۸۵ سے لے کر۱۳۷۵ کرنے پر عزت مآب وزیر اعظم جناب نریندر مودی جی اور عزت مآب مرکزی وزیر صحت و خاندانی بہبود جناب جگت پرکاش نڈا جی کا شکر گزار ہوں۔‘‘