راہل گاندھی غلط حقائق کی بنیاد پر ملک کو گمراہ کر رہے ہیں: بی جے پی

نئی دہلی، 19 اگست (یواین آئی) بھارتیہ جنتا پارٹی (بی جے پی) نے کانگریس لیڈر راہل گاندھی پر غلط حقائق کی بنیاد پر ملک کو گمراہ کرنے کا الزام لگایا ہے ۔
بی جے پی نے یہ بات مسٹر گاندھی کے ووٹر لسٹ میں بے ضابطگیوں اور ووٹ چوری کے الزامات کا جواب دیتے ہوئے کہی ہے ۔
منگل کو بی جے پی ہیڈکوارٹر میں منعقدہ ایک پریس کانفرنس میں پارٹی کے ترجمان گورو بھاٹیہ نے سی ایس ڈی ایس پر جھوٹ پھیلانے کا الزام لگایا اور کہا کہ مسٹر گاندھی نے ان غلط اعداد و شمار سے کنفیوژن پھیلایا ہے ۔
بی جے پی کے ترجمان نے کہاکہ "پچھلے کچھ دنوں سے ہم سب نے دیکھا ہے کہ ایک طرف آئین کی طاقت، سچائی اور ہندوستانی عوام کی سچائی ہے اور دوسری طرف انتشار پھیلانے اور غلط حقائق پھیلانے کا راہل گاندھی کا ماڈل ہے ، جس میں آئینی اداروں پر بے بنیاد الزامات لگانا اور الزام کا ثبوت ملنے پر بھاگ جانا ان کا کام ہے ۔” انہوں نے کہاکہ تمام اپوزیشن پارٹیوں کی طرف سے ووٹ چوری کے الزامات لگائے جا رہے ہیں، الیکٹرانک ووٹنگ مشین خراب ہے ، وی وی پیٹ کے ساتھ میچنگ درست نہیں ہے ، یہ سب مسٹر گاندھی اور اپوزیشن کے محض بے بنیاد الزامات ہیں۔ مسٹر بھاٹیہ نے کہا کہ مسٹر گاندھی نے 03 فروری 2025 کو کہا تھا کہ مہاراشٹر میں 70 لاکھ ووٹ بڑھے ہیں اور 9 جولائی 2025 کو بہار میں ایک کروڑ ووٹ بڑھے ہیں۔ آخر وہ اعداد و شمار میں اتنی بڑی تبدیلی کے بارے میں کیا کہنا چاہتے ہیں؟
انہوں نے کہا کہ جب الیکشن کمیشن اس حوالے سے حلف نامہ دینے اور بات کرنے کا کہتا ہے تو وہ ایسا نہیں کرتے کیونکہ وہ صرف جھوٹ کی دکان چلا رہے ہیں۔
مسٹر بھاٹیہ نے الزام لگایا کہ مسٹر گاندھی نے جارج سوروس سے گرو منتر لیا ہے جو ہندوستان میں سماج کو تقسیم کرتے ہیں… تب ہی آپ کو اقتدار ملے گا۔ کانگریس لیڈر گاندھی نے اس منتر کو اپنایا ہے اور وہ ملک میں ایک کے بعد ایک جھوٹ بول رہے ہیں۔