مو بوباٹ لندن اسپرٹ میں کرکٹ ڈائریکٹر مقرر

لندن، 12 اگست (یو این آئی) مو بوباٹ کو لندن اسپرٹ میں کرکٹ ڈائریکٹر مقرر کیا گیا ہے اور وہ یکم اکتوبر 2025 سے یہ عہدہ سنبھالیں گے۔ انگلینڈ کی سابق مردوں کی ٹیم کے پرفارمنس ڈائریکٹر اور آئی پی ایل میں رائل چیلنجرز بنگلور کے موجودہ کرکٹ ڈائریکٹر، فرنچائز کے 2026 سیزن کی تیاری کے لیے پہلی بڑی تقرری ہیں۔
بوباٹ کی آمد ایسے وقت میں ہوئی ہے جب اسپرٹ ایک نئے ملکیتی دور میں داخل ہو رہی ہے، جس میں ایم سی سی کے پاس ٹیم میں 51 فیصد حصہ داری ہےاور امریکہ میں قائم ٹیکنالوجی انویسٹمنٹ گروپ "ٹیک ٹائٹنز” کے پاس باقی 49 فیصد حصص ہیں۔ ای سی بی نے حال ہی میں تصدیق کی ہے کہ دی ہنڈریڈ کی تمام آٹھ ٹیمیں نجی ملکیت میں چلیں گی۔
اس دوران، لندن اسپرٹ نئے ڈھانچے کے تحت اپنا نام برقرار رکھے گی، اور 2026 کے آغاز میں اس کی نئی برانڈنگ کرنے کا منصوبہ ہے۔
اپنی نئی ذمہ داری کے بارے میں بات کرتے ہوئے، بوباٹ نے کہا، ’’ایسے دلچسپ وقت میں لندن اسپرٹ میں شامل ہونا اعزاز کی بات ہے۔ ایم سی سی اور ہمارے نئے شراکت دار ٹیک ٹائٹنز کے ساتھ کام کرتے ہوئے اس فرنچائز کے کرکٹ مستقبل کو تشکیل دینے کا موقع ناقابل یقین حد تک دلچسپ ہے۔ میں میدان کے اندر اور باہر کچھ خاص بنانے کا منتظر ہوں۔‘‘
لندن اسپرٹ کے چیئرمین جولیان میتھرل نے کہا، ’’آج لندن اسپرٹ کے لیے ایک اہم لمحہ ہے۔ مو بوباٹ کرکٹ ڈائریکٹر کے کردار میں بے مثال مہارت اور بصیرت لاتے ہیں، اور ہمیں ان کا خیر مقدم کرتے ہوئے بے حد خوشی ہو رہی ہے۔ ساتھ ہی، لندن اسپرٹ کا نام برقرار رکھنا اس شناخت پر ہمارے اعتماد کی عکاسی کرتا ہے جو ہم نے بنائی ہے ۔ اب ہم نئی توانائی اور واضح مقصد کے ساتھ ایک نئے دور کی طرف دیکھ رہے ہیں