آکاش دیپ کو ایچ آر ایس پی نمبر پلیٹ کے بغیر گاڑی نہ چلانے کی ہدایت، ڈیلر کو نوٹس

لکھنؤ، 12اگست (یواین آئی) اتر پردیش کے محکمہ ٹرانسپورٹ نے ہندوستانی ٹیم کے آل راؤنڈر آکاش دیپ پر ایچ آر ایس پی نمبر پلیٹ کے بغیر موٹر گاڑی چلانے پر پابندی لگا دی ہے۔
اس کے ساتھ ہی چنہٹ واقع کار ڈیلرشپ میسرز سنی موٹرز کا لائسنس ایک ماہ کے لیے عارضی طور پر معطل کر دیا گیا ہے۔ محکمہ نے سینٹرل موٹر وہیکل رولز 1989 کے رول 44 کے تحت ڈیلرشپ کو وجہ بتاؤ نوٹس جاری کیا ہے۔
ریجنل ٹرانسپورٹ آفیسر پی کے سنگھ کی طرف سے جاری کردہ حکم نامے میں کہا گیا ہے کہ ڈیلر نے ایک نئی ٹویوٹا فارچیونر آکاش دیپ کو رجسٹریشن کے عمل کو مکمل کیے بغیر اور ہائی سیکیورٹی نمبر پلیٹ اورتھرڈ رجسٹریشن مارک لگائے بغیر ڈلیوری کردی۔ وہیکل پورٹل ریکارڈ کے مطابق گاڑی کی فروخت بل 7 اگست کو جاری ہوئی تھی جبکہ انشورنس 8 اگست کو ہوا، لیکن روڈ ٹیکس کی ادائیگی ابھی تک نہیں کی گئی ہے۔ اس کے علاوہ رجسٹریشن کا عمل نامکمل ہے۔ اس کے باوجود گاڑی عوامی سڑکوں پر دوڑتی ہوئی پائی گئی۔