ایل پی جی سبسڈی کے لیے 42,000 کروڑ روپے کی منظوری

نئی دہلی// مرکزی کابینہ نے دو الگ الگ فیصلوں میں ایل پی جی سبسڈی کے لیے 42,000 کروڑ روپے کی تجاویز کو منظوری دی ہے ۔وزیر اعظم نریندر مودی کی زیر صدارت کابینہ کی میٹنگ میں دونوں تجاویز کو منظوری دی گئی۔ مرکزی وزیر اطلاعات و نشریات اشونی وشنو نے کہا کہ اجولا اسکیم کے استفادہ کنندگان کو رواں مالی سال 2025-26 میں ایک سال میں9 ریفل پر فی سلنڈر 300 روپے کی سبسڈی دی جائے گی۔ اس کے لیے 12,000 کروڑ روپے منظور کیا گیا ہے ۔ اس سے قبل اکتوبر 2023 سے ایک سال میں 12 ریفل پر فی سلنڈر 300 روپے کی سبسڈی دی جارہی تھی۔
سبسڈی سے 10.33 کروڑ مستفیدین کو فائدہ ہوگا۔ اجوالا اسکیم کے تحت ری فیل کو بڑھانے اور غریب صارفین کو ریلیف فراہم کرنے کے لیے حکومت نے مئی 2022 میں سالانہ 12 ریفل پر فی سلنڈر 200 روپے کی ہدفی سبسڈی متعارف کروائی تھی، جسے اکتوبر 2023 میں بڑھا کر 300 روپے کر دیا گیا تھا۔اس کے علاوہ کابینہ نے گھریلو ایل پی جی سلنڈروں کی قیمتوں پر قابو پانے کی وجہ سے تیل کی مارکیٹنگ کمپنیوں کو ہونے والے نقصانات کی تلافی کے لیے 30 ہزار کروڑ روپے کی فراہمی کو بھی منظوری دی ہے ۔
سرکاری معلومات کے مطابق گھریلو گیس سلنڈر کنٹرول قیمت پر فراہم کیے جاتے ہیں تاکہ عام صارفین پر کوئی اضافی بوجھ نہ پڑے ۔ مالی سال 2024-25 میں، بین الاقوامی مارکیٹ میں ایل پی جی کی بلند قیمتوں کی وجہ سے ، تینوں پبلک آئل مارکیٹنگ کمپنیوں کو اس مد میں بھاری نقصان اٹھانا پڑا ہے اور وہ اب بھی نقصان اٹھا رہی ہیں۔یہ رقم تین آئل مارکیٹنگ کمپنیوں انڈین آئل کارپوریشن، بھارت پیٹرولیم کارپوریشن اور ہندوستان پیٹرولیم کارپوریشن کو 12 قسطوں میں ادا کی جائے گی۔ وزارت پٹرولیم اور قدرتی گیس فیصلہ کرے گی کہ کمپنیوں میں رقم کیسے تقسیم کی جائے گی۔