دہلی کو ملی 200 نئی الیکٹرک بسوں کی سوغات

نئی دہلی، 19اگست (یو این آئی) قومی دارالحکومت کے پبلک ٹرانسپورٹ کے نظام کو مزید صاف ستھرا، محفوظ اور جدید بنانے کی سمت میں دہلی حکومت نے 200 نئی زیرو ایمیشن الیکٹرک بسوں کو بیڑے میں شامل کرنے، دہلی-کرنال انٹر اسٹیٹ الیکٹرک بس سروس شروع کرنے، خواتین کے لیے 56 خصوصی الیکٹرک بس خدمات دستیاب کرانے اور راج گھاٹ ڈپو-1 میں ہائی کیپیسٹی پبلک ای وی چارجنگ اسٹیشن شروع کرنے کا اعلان کیا ہے۔
دہلی کے وزیرِ ٹرانسپورٹ ڈاکٹر پنکج کمار سنگھ نے منگل کے روز کہا کہ دہلی کا ٹرانسپورٹ نظام تیزی سے صاف ستھرے، محفوظ اور قابلِ اعتماد پبلک ٹرانسپورٹ نظام کی طرف بڑھ رہا ہے اور اس تبدیلی میں الیکٹرک بسوں کا اہم کردار ہے۔ انہوں نے کہا کہ حکومت کا مقصد صرف بسوں کی تعداد بڑھانا نہیں، بلکہ ایسا پبلک ٹرانسپورٹ سسٹم تیار کرنا ہے جو ہر شہری کے لیے صاف ستھرا، محفوظ، آرام دہ اور آسانی سے دستیاب ہو۔
ڈاکٹر سنگھ کے مطابق، 200 نئی الیکٹرک بسوں کے شامل ہونے سے دہلی ٹرانسپورٹ کارپوریشن (ڈی ٹی سی) کے بیڑے میں بسوں کی کل تعداد تقریباً 6,800 ہو جائے گی۔ اس میں 4,938 الیکٹرک اور 1,750 سی این جی بسیں شامل ہیں۔ نئے بیڑے میں 12 میٹر لمبی 88 الیکٹرک بسیں اور نو میٹر لمبی 112 الیکٹرک بسیں شامل ہیں۔ یہ لو فلور، ایئر کنڈیشنڈ بسیں سی سی ٹی وی کیمرے، پینک بٹن، ریئل ٹائم ٹریکنگ سسٹم اور معذور مسافروں کے لیے خصوصی سہولیات سے لیس ہیں۔
انہوں نے کہا کہ انٹر اسٹیٹ الیکٹرک کنیکٹیویٹی کو مضبوط کرتے ہوئے ڈی ٹی سی دہلی-کرنال روٹ پر پانچ مکمل طور پر الیکٹرک اور ایئر کنڈیشنڈ بسیں چلائے گا۔ تقریباً 133 کلومیٹر طویل اس راہداری (کوریڈور) پر دونوں سمتوں میں روزانہ کل 10 ٹرپ کی سہولت دستیاب ہوگی۔ یہ سروس مہارانا پرتاپ آئی ایس بی ٹی، کشمیری گیٹ کو ہریانہ کے کرنال سے جوڑے گی۔ اس روٹ پر سنگھو بارڈر، رائے، بھالگڑھ، مورتھل، گنور، سمالکھا، پانی پت، گھرونڈا اور مدھوبن جیسے اہم مقامات کو کنیکٹیویٹی ملے گی۔
وزیرِ ٹرانسپورٹ نے کہا کہ دہلی-کرنال ای بس سروس مسافروں کو بین ریاستی سفر کے لیے ایک صاف ستھرا، آرام دہ اور سستا متبادل فراہم کرے گی۔ یہ سروس دہلی سے باہر بھی زیرو ایمیشن پبلک ٹرانسپورٹ کے نیٹ ورک کو وسعت دے گی۔
خواتین کی حفاظت، سہولت اور پبلک ٹرانسپورٹ تک ان کی رسائی کو بہتر بنانے کے لیے ڈی ٹی سی 56 خصوصی الیکٹرک بس خدمات شروع کرے گا۔ ان میں زیادہ مانگ والے 15 روٹس پر ‘لیڈیز اسپیشل’ کی 30 ٹرپ اور 13 روٹس پر ‘یونیورسٹی لیڈیز اسپیشل’ کی 26 ٹرپ شامل ہیں۔
وزیرِ ٹرانسپورٹ نے کہا کہ الیکٹرک بسوں کی تعداد بڑھانا، دہلی-کرنال انٹر اسٹیٹ ای بس کوریڈور شروع کرنا، خواتین کے لیے خصوصی بس خدمات دستیاب کرانا اور چارجنگ انفراسٹرکچر کو وسعت دینا دہلی کے پبلک ٹرانسپورٹ کو بدلنے کی جامع حکمتِ عملی کا حصہ ہے۔
انہوں نے کہا کہ دہلی حکومت الیکٹرک موبلٹی کو مضبوط کرنے، پبلک ٹرانسپورٹ کی صلاحیت بڑھانے اور ضروری انفراسٹرکچر تیار کرنے پر مسلسل کام کر رہی ہے۔ ان اقدامات کے ذریعے دارالحکومت میں مستقبل کے لیے تیار پبلک ٹرانسپورٹ نیٹ ورک تیار کرنے کی کوشش کی جا رہی ہے، جس میں ماحولیاتی تحفظ کے ساتھ مسافروں کی حفاظت، سہولت اور بہتر سفری تجربے کو ترجیح دی جائے گی۔