راج ناتھ کل اپنے جاپانی ہم منصب کے ساتھ دو طرفہ بات چیت میں دفاعی تعلقات کو مضبوط بنانے پر کریں گے گفتگو

نئی دہلی، 19 اگست (یو این آئی) وزیردفاع راج ناتھ سنگھ جمعرات کے روز یہاں جاپان کے وزیرِ دفاع شنجیرو کوئزومی کے ساتھ دو طرفہ میٹنگ میں دفاعی تعلقات کو مزید مضبوط بنانے، اسٹریٹجک اعتماد اور تعاون بڑھانے، ہند – بحرالکاہل خطے میں استحکام اور سکیورٹی کو فروغ دینے پر تبادلۂ خیال کریں گے۔
وزارتِ دفاع نے بدھ کے روز بتایا کہ دونوں رہنماؤں کی بات چیت کے دوران تعاون کے نئے شعبوں کے امکانات پر بھی گفتگو ہوگی۔ جاپان حکومت کی جانب سے اس سال اپریل میں دفاعی سامان اور ٹیکنالوجی کی منتقلی کے تین اصولوں کے جائزے کے بعد دونوں وزراء ‘میک ان انڈیا’ کے تحت گہرے سمندری سکیورٹی تعاون اور دفاعی سامان نیز ٹیکنالوجی تعاون کو فروغ دینے کے لیے خیالات کا تبادلہ کریں گے۔ یہ میٹنگ دو طرفہ دفاعی اور سکیورٹی تعاون کو آگے بڑھانے کے لیے ایک کارروائی کا منصوبہ تیار کرنے کا موقع فراہم کرے گی۔
ہندستان کے اپنے پہلے دورے پر آئے مسٹر شنجیرو نے آج ممبئی میں واقع ویسٹرن نیول کمانڈ کا دورہ کیا، جہاں انہوں نے چیف آف نیول اسٹاف ایڈمرل کرشنا سوامی ناتھن اور ویسٹرن نیول کمانڈ کے چیف وائس ایڈمرل سنجے وتسیاین کے ساتھ گفتگو کی۔ جاپانی وفد کوہندستانی بحریہ کے کردار، ذمہ داریوں اور آپریشنل صلاحیتوں کے بارے میں بریفنگ دی گئی۔
مسٹر شنجیرو نے ویسٹرن نیول کمانڈ میں گارڈ آف آنر کا معائنہ کیا۔ اس سے قبل، انہوں نے نیول ڈاکیارڈ میں گورو استمبھ پرگلہائے عقیدت پیش کیے۔ انہوں نے دیسی جہاز آئی این ایس چنئی کا بھی دورہ کیا۔
ہندستان اور جاپان کے مضبوط تعلقات آزاد، کھلے، مستحکم اور خوشحال ہند – بحرالکاہل خطے کے مشترکہ نقطۂ نظر کی عکاسی کرتے ہیں۔ جاپانی وزیرِ دفاع کا دو روزہ دورہ دو طرفہ دفاعی تعاون میں بڑھتی ہوئی رفتار کو اجاگر کرتا ہے اور شراکت داری کو آگے بڑھانے کے لیے دونوں فریقوں کے عزم کو بھی ظاہر کرتا ہے۔ یہ دورہ جاپانی وزیرِ اعظم سانائے تاکائیچی اور وزیرِ اعظم نریندر مودی کے درمیان یہاں سالانہ سربراہ اجلاس کے چند ہفتوں بعد ہو رہا ہے، جس میں دونوں فریقوں نے دفاعی اور سکیورٹی تعاون کو مزید مضبوط بنانے پر اتفاق کیا تھا۔