سرینگر//
نیشنل کانفرنس کے ترجمان اعلیٰ اور رکن اسمبلی تنویر صادق نے کابینہ میں توسیع کی خبروں کو رد کرتے ہوئے کہا کہ وزیر اعلیٰ کو کابینہ میں توسیع کرنے کا اختیار ہے اوروہ جب چاہیں گے اس میں توسیع کرسکتے ہیں۔
اصادق نے ساتھ ہی کہا کہ بہتر یہی ہوگا کہ اس قسم کی افواہیں نہ پھیلائی جائیں۔
این سی ترجمان اعلیٰ نے ان باتوں کا اظہار بدھ کو یہاں نامہ نگاروں کے ساتھ بات کرنے کے دوران کیا۔
کابینہ کی توسیع کے بارے میں انہوں نے کہا’’یہ وزیر اعلیٰ کے اختیار میں ہے وہ جب چاہیں گے اس میں توسیع کریں گے ، بہتر یہی ہوگا کہ اس طرح کی افواہیں نہ پھیلائی جائیں،کابینہ کی نشستیں خالی رہتی ہیں‘‘۔
بزنس رولز کے بارے میں پوچھے جانے پر ان کا کہنا تھا’’کابینہ نے ایل جی صاحب کو فائل بھیجی ہے ، مجھے لگتا ہے اس کو اب بغیر کسی تاخیر کے کلیئر کیا جانا چاہئے‘‘۔
صادق نے زور دے کر کہا کہ راجیہ سبھا اور جموں و کشمیر کی دو اسمبلی نشستوں کے ضمنی انتخابات بھی جلد سے جلد منعقد ہونے چاہئے ۔
کانگریس کے ریاستی درجے کی بحالی کو لے کر احتجاج کے بارے میں پوچھے جانے پر انہوں نے کہا’’اس پر کانگریس اور نیشنل کانفرنس کے درمیان کوئی دراڑ نہیں ہے ، ریاستی درجے کی بحالی کیلئے سب سے پہلے نیشنل کانفرنس نے جد وجہد شروع کی، کانگریس نے جو اس مطالبے کو لے کر احتجاج کرنے کا فیصلہ کیا ہے یہ اس پارٹی کا اپنا فیصلہ ہے اس سلسلے میں نیشنل کانفرنس کے ساتھ کسی بھی سطح پر رابطہ نہیں کیا گیا‘‘۔
ترجمان اعلیٰ کا کہنا تھا’’جب نیشنل کانفرنس نے ریاستی درجے کی بحالی کیلئے جد وجہد شروع کی تو ہم نے سب کو ایک ہی پلیٹ فارم پر جمع کیا، ہم چاہتے ہیں کہ ہر چیز ایک منظم طریقے سے انجام دی جائے۔‘‘
