ڈی پی ایل کا دوسرا سیزن 2 اگست سے، خاتون لیگ 17 اگست سے شروع

نئی دہلی// دہلی پریمیئر لیگ (ڈی پی ایل) کا دوسرا ایڈیشن 2 اگست سے شروع ہونے جا رہا ہے۔ ٹورنامنٹ کا آغاز ایک شاندار افتتاحی تقریب سے ہوگا، جس کے بعد پہلا مردوں کا میچ کھیلا جائے گا، جبکہ فائنل 31 اگست کو دارالحکومت دہلی کے مشہور ارون جیٹلی اسٹیڈیم میں ہوگا۔
موسم سے متعلق رکاوٹ یا کسی غیر متوقع صورتحال کی صورت میں مردوں کے فائنل کے لیے یکم ستمبر کو ریزرو دن رکھا گیا ہے۔
دوسرے سیزن میں آٹھ مردوں کی ٹیمیں اور چار خواتین کی ٹیمیں شامل ہوں گی، جن کا بنیادی مقصد مقابلہ جاتی توازن، نئی ابھرتی صلاحیتوں اور شائقین کی بھرپور شمولیت پر ہوگا۔
دہلی پریمیئر لیگ نے اپنی آٹھ ٹیموں کو چار چار کے دو گروپوں میں تقسیم کیا ہے۔
گروپ اے میں: آؤٹر دہلی واریئرز، سینٹرل دہلی کنگز، نیو دہلی ٹائیگرز اور نارتھ دہلی اسٹرائیکرز شامل ہیں۔
گروپ بی میں: ویسٹ دہلی لائنز، ایسٹ دہلی رائڈرز، ساؤتھ دہلی سپر اسٹارز اور پرانی دہلی 6 شامل ہیں۔
مردوں کی لیگ کا فارمیٹ
مردوں کے اس ٹورنامنٹ میں کل 40 میچز ہوں گے، جن میں 8 ٹیمیں ٹائٹل کے لیے آپس میں مقابلہ کریں گی۔ ٹیموں کو دو گروپوں میں تقسیم کیا گیا ہے۔ ہر ٹیم اپنے گروپ کی دیگر تین ٹیموں کے ساتھ ڈبل راؤنڈ رابن (دو میچ – ہوم اور اوے) کھیلے گی اور دوسرے گروپ کی چار ٹیموں کے ساتھ سنگل راؤنڈ رابن (ایک میچ) کھیلے گی، یوں ہر ٹیم کے کل 10 میچ ہوں گے۔
ٹاپ دو ٹیمیں کوالیفائر 1 میں آمنے سامنے آئیں گی، جس کی فاتح ٹیم براہ راست فائنل میں جگہ بنائے گی۔ تیسری اور چوتھی پوزیشن والی ٹیمیں ایلیمینیٹر کھیلیں گی، جہاں ہارنے والی ٹیم باہر ہو جائے گی۔ ایلیمینیٹر جیتنے والی ٹیم کوالیفائر 2 میں کوالیفائر 1 کی ہارنے والی ٹیم سے مقابلہ کرے گی۔ اس میچ کا فاتح فائنل میں اپنی جگہ بنائے گا اور کوالیفائر 1 کے فاتح سے ٹائٹل کے لیے ٹکرائے گا۔
گرینڈ فائنل 31 اگست کو ہوگا۔مردوں کے فائنل کے لیے یکم ستمبر کو ریزرو دن مقرر ہے۔
خواتین کا ٹورنامنٹ 17 اگست سے 24 اگست تک چلے گا، جس میں چار ٹیمیں شامل ہوں گی اور راؤنڈ رابن فارمیٹ میں کل 6 میچ کھیلے جائیں گے۔ لیگ مرحلے کی ٹاپ دو ٹیمیں فائنل کے لیے کوالیفائی کریں گی۔
لیگ کے آغاز سے قبل ڈی ڈی سی اے کے صدر روہن جیٹلی نے کہا:’’ڈی پی ایل کا دوسرا سیزن دہلی میں ڈومیسٹک فرنچائز کرکٹ کے لیے ایک نیا باب ثابت ہوگا۔ راؤنڈ رابن فارمیٹ اور دو نئی مردوں کی ٹیموں کی شمولیت سے مقابلے کا معیار کافی بلند ہو جائے گا۔ خواتین لیگ بھی مستقل ترقی کی راہ پر گامزن ہے اور دہلی کی ابھرتی ہوئی خواتین کرکٹرز کے لیے ایک مضبوط پلیٹ فارم ثابت ہوگی۔ ہمارا مقصد ایک معیاری، مستحکم لیگ تیار کرنا ہے جو دہلی کے کھلاڑیوں کو وہ شناخت دلائے جس کے وہ حقدار ہیں اور ہمیں ڈی پی ایل کے ساتھ رکھی جا رہی اس بنیاد پر فخر ہے۔‘‘