فوج کی شمالی کمان کے کمانڈر کا آپریشنل تیاریوں کا جائزہ

جموں//
شمالی فوج کے کمانڈر لیفٹیننٹ جنرل پرتیک شرما نے جمعرات کے روز جموں و کشمیر میں مختلف آپریشنل لاجسٹک یونٹوں کا دورہ کرکے وہاں پر آپریشنل تیاریوں کا جائزہ لیا۔
فوج کی شمالی کمان ہیڈکوارٹر کی جانب سے جاری بیان کے مطابق، جنرل شرما نے آپریشنل لاجسٹکس یونٹس کا معائنہ کرتے ہوئے جدید جنگی ضروریات کے تناظر میں ٹیکنالوجی سے لیس لاجسٹک سپورٹ کی اہمیت پر زور دیا۔
بیان کے مطابق’’لیفٹیننٹ جنرل پراتک شرما نے لاجسٹک تبدیلیوں اور خودکار نظاموں کا مشاہدہ کیا جو کہ آپریشنل تیاریوں کو مضبوط بنانے کے ویژن کے تحت اپنائے جا رہے ہیں‘‘۔
انہوں نے یونٹوں میں تعینات افسران و اہلکاروں کی پیشہ ورانہ مہارت اور چوبیس گھنٹے متحرک تیاری کو سراہا اور کہا کہ فورسز کی لاجسٹک صلاحیتیں کثیر جہتی آپریشنل تقاضوں کو پورا کرنے میں پوری طرح اہل ہیں۔
لیفٹیننٹ جنرل نے جدید ٹیکنالوجی پر مبنی خودکار طریقہ کار کو سراہتے ہوئے کہا کہ بدلتے ہوئے جنگی منظرنامے میں ایسے اقدامات ناگزیر ہیں تاکہ فوجی مشن ہر سطح پر کامیاب اور مستحکم رہیں۔
یہ دورہ ایسے وقت میں ہوا ہے جب جموں و کشمیر میں سلامتی کی صورتحال کے پیش نظر آپریشنل تیاریوں اور لاجسٹک سہولیات کو مزید مؤثر بنانے پر توجہ مرکوز کی جا رہی ہے ۔