سرینگر//
گجرات کے شہر احمد آباد میں ایک مسافر ہوائی جہاز حادثے کا شکار ہو گیا جس کی نتیجہ میں کم از کم ۲۰۰؍افراد کی موت ہو گئی ہے ۔ایک بھارتی نژاد برطانوی شہری زندہ بچ گیا ہے ۔
وفاقی وزیر داخلہ‘امیت شاہ نے کہا ہے کہ حادثے میں ہوئیں حتمی اموات کا تعین ڈی این اے ٹیسٹ کے نتائج کے بعد ہی ممکن ہے ۔
حکام نے طیارہ حادثے میں کم از کم ۲۰۴؍ افراد کی ہلاکت کی تصدیق کی ہے۔ طیارے پر سوار ایک برطانوی مسافر کے زندہ بچ جانے کی اطلاعات ہیں جنھوں نے مقامی میڈیا کو بتایا کہ ’ٹیک آف کے۳۰ سیکنڈ بعد زوردار آواز آئی اور پھر طیارہ تباہ ہو گیا۔ یہ سب بہت تیزی سے ہوا۔‘
لندن جانے والی پرواز میں۲۳۲ مسافر اور عملے کے۱۰؍ افراد سوار تھے۔طیارہ میڈیکل کالج کے ڈاکٹروں کے ہاسٹل سے ٹکرا گیا ، جس سے پانچ طلبا ہلاک ہو گئے۔ حادثے کی جگہ کے مناظر سے پتہ چلتا ہے کہ ملبہ ہاسٹل کے کھانے کے ہال کی دیوار سے چھید گیا تھا ، کچھ پلیٹوں پر اب بھی کھانا نظر آتا ہے۔
طیارے کی کم اڑان اور اونچائی حاصل کرنے کے لیے جدوجہد کرنے کی ویڈیو میں دکھایا گیا ہے کہ طیارہ زمین سے ٹکرا رہا ہے اور دوپہر ۳۸:۱ بجے آگ کے ایک بڑے گولے میں پھٹ گیا۔ یہ ایندھن سے بھرا ہوا تھا کیونکہ یہ لندن کے لیے طویل فاصلے پر اڑ رہا تھا۔
ٹیک آف کے فورا بعد ، پائلٹ نے مئی ڈے کال بھیجی۔ اطلاعات کے مطابق اس کے بعد ایئر ٹریفک کنٹرولر کی طرف سے بار بار کی جانے والی کالوں کا کوئی جواب نہیں آیا۔
احمد آباد پولیس کے سربراہ جی ایس ملک نے بی بی سی کو بتایا ہے کہ طیارہ حادثے میں مرنے والے ۲۰۴؍ افراد کی لاشیں نکال لی گئی ہیں۔ابھی یہ واضح نہیں ہے کہ یہ ۲۰۴ مسافر جہاز کے مسافر تھے یا پھر جب جہاز تباہ ہوا تو زمین پر بھی مرنے والے اس میں دیگر افراد کی لاشیں بھی شامل ہیں۔
ملک نے بتایا کہ ۴۱ زخمی افراد ابھی ہسپتال میں زیر علاج ہیں۔
لندن جانے والا یہ بوئنگ ۷۸۷ ڈریم لائنر جمعرات کی سہ پہر مقامی وقت کے مطابق ٹیک آف کے فوراً بعد نیچے گر گیا۔اس جہاز میں ۲۴۲؍ افراد سوار تھے‘جن میںبھارتی شہریوں کے علاوہ برطانوی، اور کچھ پرتگالی اور ایک کینیڈین شہری شامل تھے۔
احمد آباد شہر میں لوگوں نے پہلے ایک دھماکے کی آواز سنی پھر آسمان میں سیاہ دھواں اْڑتے دیکھا۔احمد آباد کے ایک رہائشی نے خبر رساں ادارے پی ٹی آئی کو بتایا کہ ’میں گھر پر تھا جب ہم نے ایک بڑی زوردار آواز سنی۔‘ان کے مطابق ’جب ہم یہ دیکھنے باہر گئے کہ کیا ہوا ہے تو ہوا میں دھوئیں کی ایک تہہ تھی، جب ہم یہاں پہنچے تو تباہ ہونے والے طیارے کا ملبہ اور لاشیں ہر طرف بکھری ہوئی تھیں۔‘
طیارہ ایئرپورٹ سے کچھ فاصلے پر سول ہسپتال کے قریب ڈاکٹرز کے ہاسٹل پر گرا۔
یہ واضح نہیں ہے کہ جہاں پر یہ طیارہ گراہ ہے وہاں اندر کتنے لوگ موجود تھے۔لیکن ایک رپورٹ میں بتاگیا کہ ہاسٹل میں پانچ لوگوں کی موت ہو گئی ۔ ایک عینی شاہد کے مطابق،لوگوں کو ’خود کو بچانے کے لیے‘ تیسرے منزل سے چھلانگ لگاتے دیکھا گیا۔نامعلوم رہائشی نے خبر رساں ادارے اے ایف پی کو بتایا کہ ’طیارہ آگ کی لپیٹ میں تھا۔‘انھوں نے کہا کہ ’ہم نے لوگوں کو عمارت سے باہر نکالنے میں مدد کی اور زخمیوں کو ہسپتال بھیج دیا۔‘
ایک فلائٹ سیفٹی کے ماہر مارکو چین کا کہنا ہے کہ جب طیارے کو حادثہ پیش آیا تو موسم کی صورتحال مستحکم تھی اور مطلع صاف تھا۔ایوی ایشن ویدر فورکاسٹ جیسے ایم ای ٹی اے آر کے نام سے جانا جاتا ہے کے مطابق کہ اس موقع پر ہواؤں کی رفتار ہلکی تھی اور حدِ نگاہ چھ کلومیٹر تک تھی۔
چین کا مزید کہنا تھا کہ ’اس دوران بادلوں یا کوئی غیر معمولی موسمی صورتحال پیدا ہونے کی اطلاعات نہیں ہیں اور نہ ہی آندھی، طوفان یا ایسی مشکل صورتحال تھی جس سے یہ حادثہ ہوا ہو۔‘
اس دوران وزیر داخلہ امت شاہ نے کہا ہے کہ جمعرات کو ایئر انڈیا طیارہ حادثے میں کئی افراد ہلاک ہوئے ہیں۔ان کاکہنا تھا’’ایئر انڈیا کی پرواز اے آئی ۱۷۱ آج دوپہر کو گر کر تباہ ہو گئی ، اور کئی مسافر اپنی جانیں گنوا چکے ہیں‘‘۔
صورتحال کا جائزہ لینے کے بعد شاہ نے نامہ نگاروں سے کہا کہ پورا ملک صدمے میں ہے اور ان لوگوں کے لواحقین کے ساتھ کھڑا ہے جنہوں نے اپنی جانیں گنوائیں۔
اس دوران شہری ہوا بازی کے وزیر نے میڈیا کو بتایا ہے کہ گجرات کے سابق وزیر اعلیٰ وجے روپانی ایئر انڈیا طیارہ حادثے میں ہلاک ہو گئے ہیں۔۶۸ برس کے وجے روپانی نے۲۰۱۶ سے ۲۰۲۱ تک گجرات کے وزیر اعلیٰ کے طور پر خدمات انجام دیں۔وہ حکمران جماعت بی جے پی کے رکن تھے۔
طیارے میں سوار مسافروں میں۱۶۹ہندوستانی شہری‘۵۳برطانوی، ایک کینیڈا کا شہری اور سات پرتگالی شہری شامل تھے ۔
یہ طیارہ انڈین ایئر لائنز کے بیڑے میں۲۰۱۶میں شامل کیا گیا تھا۔ ڈائریکٹوریٹ جنرل آف سول ایوی ایشن (ڈی جی سی اے ) نے اس حادثے کی تحقیقات کے احکامات دے دیے ہیں۔
شہری ہوابازی کے وزیر رام موہن نائیڈو نے واقعے کی جگہ پر صحافیوں سے کہا کہ اس حادثے کی غیر جانبدارانہ اور تفصیلی تحقیقات کرائی جائیں گی اور یہ پتہ لگایا جائے گا کہ یہ حادثہ کس وجہ سے پیش آیا۔ ہلاک شدگان کی تعداد کا بھی فی الحال تعین کیا جا رہا ہے ۔
برطانیہ کی ایئر ایکسیڈنٹ انویسٹی گیشن ایجنسی (اے اے آئی بی) نے احمد آباد کے حادثے کی تحقیقات میں ہندوستان کی مدد کی پیشکش کی ہے ۔ برطانوی ایجنسی نے کہا کہ اس کی یہ پیشکش اس لیے ہے کیونکہ اس حادثے میں اس نے اپنے کچھ شہریوں کو بھی کھو دیا ہے ۔
دنیا بھر کے رہنماؤں نے اس المناک حادثے پر افسوس اور تعزیت کا اظہار کیا ہے ۔
ڈی جی سی اے کے ایک بیان میں کہا گیا کہ ایئر انڈیا کے طیارے وی ٹی…اے این بی نے احمد آباد سے لندن کے گیٹوک ہوائی اڈے کے لیے اڑان بھری تھی، لیکن فوراً بعد یہ حادثے کا شکار ہو گیا۔ طیارے کی کمان کیپٹن سُمت سبھروال کے پاس تھی اور ان کے ساتھ فرسٹ آفیسر کلائیو کندر تھے ۔ کیپٹن سُمت سبھروال۸۲۰۰گھنٹوں کے تجربے والے پائلٹ ہیں۔ شریک پائلٹ کے پاس ۱۱۰۰گھنٹوں کا پرواز کا تجربہ تھا۔
ایئر ٹریفک کنٹرول (اے ٹی سی) کے مطابق، طیارے نے رن وے نمبر ۲۳سے دوپہر ایک بج کر۳۹منٹ پر اڑان بھری تھی۔ اڑان بھرنے کے چند لمحوں بعد اس نے اے ٹی سی کو ‘مے ڈے ’ یعنی انتہائی سنگین ایمرجنسی کا اشارہ دیا، لیکن اس کے بعد اے ٹی سی کی طرف سے کی گئی کال پر طیارے سے کوئی جواب نہیں آیا۔ اس کے فوراً بعد طیارہ ہوائی اڈے کے قریب رہائشی علاقے میں گر گیا اور حادثے کی جگہ سے کالے دھویں کے گہرے بادل اٹھنے لگے ۔
ہوائی اڈے کے ترجمان نے بتایا کہ حادثے کے بعد ہوائی اڈے سے تمام پروازوں کی آمد و رفت کو عارضی طور پر روک دیا گیا اور یہ پابندی کچھ گھنٹوں بعد ہٹا دی گئی۔ طیارے کے رن وے سے اڑان بھرنے کے فوراً بعد، پائلٹ نے احمد آباد کے ایئر ٹریفک کنٹرول روم کو ‘مے ڈے کال’ یعنی انتہائی سنگین ایمرجنسی کی اطلاع دی اور اس کے بعد اس سے رابطہ منقطع ہو گیا۔ طیارہ۷۰۰تا۶۰۰فٹ کی بلندی تک جانے کے بعد تیزی سے نیچے آنے لگا اور ہوائی اڈے کی چاردیواری سے باہر میگھانینگر رہائشی علاقے میں ایک اسپتال کے احاطے کے ہاسٹل پر گرا اور اس میں آگ لگ گئی۔
طیارے کے حادثے کا شکار ہونے کے فوراً بعد فائر بریگیڈ کی گاڑیاں اور پولیس کے جوان واقعے کی جگہ پر پہنچ کر امدادی اور بچاؤ کے کام میں لگ گئے ۔ بعد میں نیشنل ڈیزاسٹر ریسپانس فورس (این ڈی آر ایف) کی ٹیمیں اور مرکزی فورسز بھی واقعے کی جگہ پر پہنچ گئیں۔
نیشنل سیکیورٹی گارڈ (این ایس جی) اور ایئر کرافٹ ایکسیڈنٹ انویسٹی گیشن بیورو (اے اے آئی بی) کی ٹیمیں بھی احمد آباد پہنچ چکی ہیں۔ ایئر انڈیا نے طیارے کے مسافروں اور عملے کے ارکان کے قریبی لواحقین کو دہلی اور ممبئی سے احمد آباد لانے اور لے جانے کے لیے دو خصوصی پروازوں کا انتظام کیا ہے ۔
صدر جمہوریہ ہند دروپدی مرمو، وزیر اعظم نریندر مودی، لوک سبھا میں اپوزیشن لیڈر راہل گاندھی اور کانگریس صدر ملیکارجن کھڑگے اور مختلف ریاستوں کے گورنرز اور وزرائے اعلیٰ نے اس سانحے پر گہرے افسوس کا اظہار کیا ہے ۔ کئی ممالک کے سربراہان نے بھی اس حادثے پر دکھ کا اظہار کیا ہے ۔
امریکی طیارہ کمپنی بوئنگ کے ڈریم لائنر کا یہ پہلا ایسا حادثہ ہے جس میں لوگوں کی ہلاکتیں ہوئی ہیں۔
